Vinnuskólinn hættur störfum sumarið 2025

Vinnuskólanum lauk fimmtudaginn 14. ágúst, en hann hófst 10. júní og hefur því verið starfandi í rúma 2 mánuði.

Yfir 300 unglingar störfuðu í Vinnuskólanum í sumar á mismunandi tímabilum við að fegra og snyrta bæinn. Þá starfaði stór hópur hjá hinum ýmsu stofnunum sveitarfélagsins og íþróttafélögum.

Einnig var starfræktur svokallaður Listavinnuskóli og í sumar var lögð áhersla á tónlist. Þeir sem völdu þann kost héldu tónleika í lokin og sýndu þar með afrakstur námskeiðsins. Veðrið í sumar var mun betra en í fyrra og hefur það mikið að segja fyrir alla útivinnu, allt verður léttara og skemmtilegra.

Vinnuskólinn er sífellt í endurskoðun og reynt er að bjóða upp á ýmsa tilbreytingu með vinnunni. En tímabilið er stutt sem Vinnuskólinn er starfræktur og mörg og margvísleg verkefni sem þarf að sinna.