Byggðasafnið í Görðum

Byggðasafnið í Görðum hefur á undanförnum árum skipað sér verðugan sess sem eitt helsta aðdráttarafl Akraness enda mikil upplifun að koma þangað, jafnvel fyrir þá sem hafa annars ekkert gaman af söfnum.

Í safninu er sögu byggðar, atvinnu og mannlífs sunnan Skarðsheiðar gerð góð skil. Ný grunnsýning var opnuð í maí 2021, en hún fjallar um hvernig var, og er að lifa og starfa á vogskornu nesi á vestanverðu Íslandi. Sagan er rakin frá litlu sjávarþorpi á 17. öld til nútímalegs kaupstaðar með um átta þúsund íbúa. Sýningin byggist á frásögnum, myndum og munum á báðum hæðum hússins.

Á undanförnum árum hafa gömul hús sem tengjast sögu Akraness verið flutt á byggðasafnið og gerð upp til minningar um liðna tíma. Þar má einnig finna vísi að bátasafni og þar er Íslands eini kútter, kútter Sigurfari, varðveittur. Gamli prestsbústaðurinn í Görðum eða Garðahúsið (frá 1876) er fyrsta steinsteypta íbúðarhúsið af sinni gerð sem byggt var hérlendis og jafnvel á Norðurlöndum.

Tekið er á móti hópum og fara pantanir í gegnum netfangið museum@museum.is eða í síma 433-1150.

Upplýsingar um opnunartíma, fréttir og fleira má finna á heimasíðu byggðasafnsins.

Fyrir áhugasöm má hér sjá myndband um nýlega grunnsýningu safnsins sem tilnefnd var til Íslensku safnaverðlaunanna 2022: