Bláfáninn
Langisandur á Akranesi fékk umhverfisvottun Bláfánans í fyrsta skipti sumarið 2013. Bláfáninn er alþjóðlegt umhverfismerki sem hefur þann tilgang að stuðla að verndun umhverfis hafna og baðstranda. Bláfánann hljóta þeir einir sem leggja sig fram um að bæta gæði og þjónustu stranda og smábátahafna og stuðla að verndun umhverfis.
Bláfáninn er tákn um að umhverfismál, öryggismál og umhverfisfræðslumál séu í hávegum höfð hjá handhöfum fánans. Bláfáninn er veittur þeim baðströndum sem uppfylla ákveðin skilyrði varðandi umhverfisfræðslu og upplýsingagjöf, vatnsgæði, umhverfisstjórnun, öryggi og þjónustu. Vottunarstofan Tún er umsjónaraðili Bláfánans á Íslandi, hægt er að finna frekari upplýsingar um Bláfánann á hér.
Heilbrigðiseftirlit Vesturlands tekur sýni úr sjónum reglulega og hafa þau komið mjög vel út. Nánari upplýsingar um niðurstöður mælinga má sjá hér fyrir neðan undir Vatnsgæði á Langasandi.
Fræðsluverkefni eru unnin í tengslum við Bláfánann af börnum og ungmennum á Akranesi.
Börn í 6. bekk í báðum grunnskólum hafa hreinsað strandlengjuna á vorin, leikskólabörn hafa unnið með sérstök verkefni sem tengjast Langasandi sem og börn í hópnum Gaman saman í félagsmiðstöðinni Þorpinu. Starfsmenn vinnuskólans (14-17 ára) sjá svo um að halda ströndinni hreinni á sumrin og verkefnið er kynnt í handbók vinnuskólans.
Við þessi tækifæri fá börnin fræðslu um Bláfánann, Langasand, lífríkið, umhverfið og mikilvægi þess að vernda það.
Auk þess eru reglulega haldnir viðburðir á ströndinni líkt og Helgasundið, en þá synda þátttakendur tæpan kílómetra frá Sementsbryggjunni yfir á Langasand til minningar um Helga Hannesson sundkennara.
Einnig má nefna hina árlegu sandkastalakeppni á Írskum dögum þar sem bæjarbúar og gestir fjölmenna á Langasand og búa til hin ýmsu sköpunarverk úr sandi.
Nánari upplýsingar um Langasand og Bláfánann gefur Jón Arnar Sverrisson garðyrkjustjóri: jonsverris@akranes.is.
Vatnsgæði á Langasandi
Langisandur stenst kröfur um gæði vatns/sjávar. Gæði sjávar við Langasand eru vöktuð reglulega og vatnssýni send til sjálfstæðrar og vottaðrar rannsóknarstofu.
Sýni eru tekin einu sinni í mánuði yfir Bláfánatímabilið, á tveimur stöðum við ströndina og staðsetning sýnd á upplýsingaskilti. Hér að neðan er tafla sem sýnir hvenær sýni voru tekin og hvort þau stóðust kröfur um fjölda baktería sem má finnast í strandsjó. Fylgst er með tveimur mismunandi gerðum baktería. Ef niðurstöður rannsókna standast ekki kröfur verður að taka Bláfánann niður. Lítill fjöldi baktería fundinn í sýnum sýna að sjórinn er hreinn en hár fjöldi baktería gefa vísbendingu um að sjórinn gæti verið mengaður af völdum skólps.
Niðurstöður við sýnatöku 2025.
