Umhverfisverðlaun
Þann 25. apríl ár hvert er Dagur umhverfisins haldinn á Íslandi. Af því tilefni fer fram árleg vorhreinsun á Akranesi þar sem Akraneskaupstaður og íbúar bæjarins taka höndum saman og hreinsa bæinn eftir langan vetrardvala. Hreinsunin hefur hingað til farið fram í lok apríl og verið fram í maí. Stofnanir Akraneskaupstaðar, s.s. leik- og grunnskólar eru einstaklega duglegir að halda umhverfinu hreinu og eru umhverfisfræðslur mjög áberandi í skólum Akraneskaupstaðar. Mikil vitundarvakning hefur verið á Íslandi um mikilvægi þess að halda umhverfinu okkar hreinu og er mikilvægt að umhverfismál þurfa að vera samtvinnuð öllum athöfnum hversdagslífsins, bæði í leik og starfi. Áskorunin er mikil en ávinningurinn er ætíð meiri.
Hjá Akraneskaupstað eru árlega veittar umhverfisviðurkenningar. Það hafa verið veittar viðurkenningar fyrir einstaklega fallegar og snyrtilegar einka-, fyrirtækja- og fjölbýlislóðir, í flokki hvatninga- og samfélagsverðlauna, fyrir tré ársins og fallegustu götumyndina. Íbúar hafa tilnefnt í upptalda flokka og skipuð valnefnd hefur einnig tilnefnt og gefið sitt álit. Það er skipulags- og umhverfisnefnd Akraneskaupstaðar sem hefur umsjón með verðlaununum og tekur ákvörðun um hverjir hljóta viðurkenningar hverju sinni.
Viðurkenningar síðustu ára:
Snyrting gróðurs á lóðarmörkum
Á haustin eru garðeigendur á Akranesi vinsamlega beiðnir um að snyrta trjágróður sem kominn er út fyrir lóðamörk. Þau tilmæli koma fyrst og fremst til þess að tryggja öruggar og greiðar leiðir um göngustíga bæjarins fyrir bæði hjólareiðendur og göngufólk. Einnig er þessi snyrting mjög nauðsynleg þegar kemur að snjómokstri og söltun um göngustíga á Akranesi. Garðeigendur eru sérstaklega hvattir til að kynna sér eftirfarandi reglur Akraneskaupstaðar:
Í 3.-5. mgr. 11. gr. Lögreglusamþykktar fyrir Akraneskaupstað kemur eftirfarandi fram:
Eiganda eða umráðamanni húss er skylt að fjarlægja af húsi sínu snjó og grýlukerti, sem fallið geta niður og valdið hættu fyrir vegfarendur.
Húseigendum er skylt að hlíta fyrirmælum bæjaryfirvalda um frágang girðinga o.þ.h. sem liggja að almannafæri. Einnig skal húsráðendum skylt að snyrta allan gróður, þ.m.t. trjágróður, sem liggur að almannafæri þannig að umferð vegfarenda sé óhindruð.
Gróður, s.s. tré, runnar o.s.frv. skulu ekki skaga út í eða út yfir gangstéttar, gangstíga eða götur, þó er heimilt að þau skagi út yfir, ef hæð þeirra er a.m.k. 2,8 m yfir gangstétt eða gangstíg, en 4,0 m yfir götu. Nánari reglur um skerðingu gróðurs skulu settar af tækni- og umhverfissviði Akraneskaupstaðar og kynntar bæjarbúum með tryggilegum hætti. Hlíti húseigandi eða lóðarhafi ekki fyrirmælum bæjaryfirvalda um frágang samkvæmt þessari grein er heimilt að láta vinna verkið á hans kostnað enda sé honum tilkynnt um það með hæfilegum fyrirvara.
Reglur um umgengni á lóðum
Bæjarstjórn Akraness samþykkti á fundi sínum þann 13. október 2015, reglur um umgengni og þrifnað utanhúss á Akranesi. Með nýju reglunum er eigendum eða umráðamönnum húsa og lóða gert skylt að halda eignum vel við, hreinum og snyrtilegum þ.á.m. húsum, lóðum og girðingum. Þá er bannað er að skilja eftir, flytja eða geyma lausamuni á þann hátt að valdið geti skaða, mengun eða lýti á umhverfinu. Þetta gildir um smærri hluti og t.d. kerrur, bílhluta, bílflök, o.s.frv. Einnig er óheimilt að geyma báta, kerrur, skráningarskyld ökutæki án skráningarmerkja, tæki, vinnuvélar, bílflök eða aðra hluti á bifreiðastæðum sveitarfélagsins, við götur og/eða á almannafæri. Heilbrigðisnefnd Vesturlands er heimilt að láta fjarlægja slíka hluti á kostnað og ábyrgð eiganda að undangenginni viðvörun. Reglurnar byggjast á lögum um hollustuhætti og mengunarvarnir nr. 7/1998 og reglugerð um hollustuhætti nr. 941/2002.
