Sundlaugar
Á Akranesi eru tvær sundlaugar, Jaðarsbakkalaug og Bjarnalaug. Sundlaugarnar eru báðar opnar almenningi en einnig eru þær notaðar undir kennslu fyrir nemendur grunnskóla, sundæfingar Sundfélags Akraness ásamt sundskóla og ungbarnasundi.
Á Akranesi fá börn frítt í sund þar til 1. júní það ár sem þau verða 16 ára. Öryrkjar sem framvísa örorkuskírteini og eldri borgarar fá 50% afslátt af stöku skipti og kortum. Atvinnulausir sem eru á skrá hjá Vinnumálastofnun Vesturlands fá 50% afslátt af stöku skipti í sund.
Forstöðumaður íþróttamannvirkja er Daníel Sigurðsson Glad sem veitir nánari upplýsingar í tölvupósti og síma 433-1100.
Jaðarsbakkalaug
Jaðarsbakkalaug er 25 metra útisundlaug með heitum pottum, gufu og vatnsrennibraut.
Skemmtileg sundlaug fyrir fjölskylduna, sundkappann og til sólbaðs. Sundlaugin er opin alla virka daga frá kl. 6:30-22 og um helgar frá kl. 9-19.
Bjarnalaug
Bjarnalaug er 12,5 metra innilaug með heitum potti sem staðsettur er í laugargarði utandyra. Bjarnalaug er einstaklega skemmtileg sundlaug og er til útleigu fyrir hin ýmsu tækifæri (útleiguhópar verða þó að vera eldri en 18 ára). Bjarnalaug er staðsett að Laugarbraut 6. Hún var teiknuð af Guðjóni Samúelssyni og opnuð árið 1944.
Laugin er notuð sem kennslulaug fyrir Brekkubæjarskóla, en einnig fer þar fram ungbarnasund og sundskóli. Bjarnalaug er opin almenningi yfir vetrartímann (september og til loka apríl) á laugardögum og sunnudögum frá kl. 10-15 en þá er laugin hituð í 33-34°C.
Nánari upplýsingar eru í síma 433-1130 en einnig er hægt að hafa samband með tölvupósti.
Guðlaug
Á Langasandi er hægt að baða sig í sjónum og njóta útsýnisins í Guðlaugu sem er heit laug staðsett í grjótgarðinum á Langasandi.
Guðlaug er á þremur hæðum, efst er útsýnispallur, þar undir heit setlaug og sturtur ásamt tækjarými og neðst er grunn vaðlaug. Á milli hæðanna eru tröppur sem einnig mynda tengingu á milli bakka og fjöru.
Guðlaug er skilgreind sem náttúrulaug/afþreyingarlaug sem er opin árið um kring. Gjaldskrá Guðlaugar má sjá hér.
Nánari upplýsingar má lesa hér og einnig hér á Facebook síðu Guðlaugar.
