Þjónusta við fatlaða
Þjónusta við fatlað fólk getur verið margskonar og fer eftir þörfum hvers og eins einstaklings. Akraneskaupstaður veitir stuðnings- og stoðþjónustu, búsetuþjónustu, aðstoð til að finna atvinnu við hæfi, akstursþjónustu, heimsendingu matar og ráðgjöf.
Einstaklingar geta óskað eftir viðtali til að ræða stuðning, búsetuúrræði eða aðra þjónustu. Nánari upplýsingar um stuðningsþjónustu við fatlað fólk eru veittar í síma 433 1000.
Stuðningsþjónusta
Fatlað fólk getur þurft á stuðningi að halda til að lifa sjálfstæðu lífi. Markmið stuðnings- og stoðþjónustu snýr að því að aðstoða, leiðbeina og efla einstaklinga sem þurfa stuðning við athafnir daglegs lífs og til að geta verið félagslega virkir. Fatlað fólk sem þarf á stuðningi að halda getur sótt um hann í gegnum þjónustugátt Akraneskaupstaðar.
Atvinna með stuðningi
Í lögum um málefni fatlaðra segir að veita skuli fötluðu fólki aðstoð til að sinna störfum á almennum vinnumarkaði þegar þess gerist þörf. Skal það gert með sérstakri liðveislu á vinnustað, svo og fræðslu og leiðbeiningum til annars starfsfólks. Eins skal veita fötluðu fólki starfsþjálfun í almennum fyrirtækjum eða stofnunum þar sem því verður við komið. Í þeim tilvikum skal gera sérstakan samning þar sem m.a. er kveðið á um þjálfunartímabil og greiðslu kostnaðar. Er það gert í samvinnu við atvinnurekanda og Tryggingarstofnun ríkisins.
Fatlaðir með lögheimili á Akranesi hafa rétt á að sækja um þjónustuna. Hægt er að óska eftir viðtali með því að hafa samband við Þjónustuver Akraneskaupstaðar í síma 433 1000. Eftir móttöku umsóknar er umsækjandi boðaður í viðtal hjá umsjónarmanni atvinnu með stuðningi. Í framhaldi af því er umsóknin tekin fyrir á teymisfundi sem afgreiðir umsóknina. Skriflegt svar sendist umsækjanda að afgreiðslu lokinni.
Búsetuþjónusta fatlaðra
Einstaklingur með fötlun telst sá sem vegna andlegrar eða líkamlegrar fötlunar þarfnast sérstakrar þjónustu og stuðnings af þeim sökum. Hér er átt við þroskahömlun, geðfötlun, hreyfihömlun eða sjón- og heyrnarskerðingu. Enn fremur getur fötlun verið afleiðing langvarandi veikinda eða slyss. Í lögum um málefni fatlaðra er kveðið á um að fólk með fötlun skuli eiga kost á félagslegri þjónustu sem gerir því kleift að búa á eigin heimili og húsnæðisúrræðum í samræmi við þarfir þess og óskir eftir því sem kostur er. Hér á heimasíðu Velferðarráðuneytisins má einnig finna gagnlegar upplýsingar.
Réttur til búsetuþjónustu fatlaðra
Búsetuþjónusta fatlaðra er veitt fötluðu fólki sem býr í eigin húsnæði, leiguhúsnæði á eigin vegum sem og fólki sem býr í íbúðakjörnum og á sambýlum. Þjónustan er veitt samkvæmt þjónustuáætlun eða þjónustusamningi við viðkomandi aðila sem byggist á niðurstöðum mats og samkomulagi við viðkomandi eða talsmann hans.
Umsókn um búsetuþjónustu
Fatlað fólk með lögheimili á Akranesi getur sótt um búsetuþjónustu með því að bóka viðtal við ráðgjafa, þar sem metin er þörf fyrir stuðning í samráði við umsækjanda eða aðstandendur hans.
Nánari upplýsingar um búsetuþjónustu fatlaðra eru veittar á netfangið velferd@akranes.is eða í síma 433-1000.
Réttindagæsla
Hlutverk réttindagæslumanns er að veita þeim fatlaða einstaklingi, sem á erfitt með að gæta réttinda sinna sjálfur, aðstoð og ráðgjöf, telji hinn fatlaði einstaklingur eða einhver sem stendur honum nærri að réttindi hans séu ekki virt sem skyldi.
Réttindagæslumenn fylgjast með högum fatlaðs fólks á sínu svæði og koma með ábendingar til sveitarfélaga, stofnana og annarra aðila á svæðinu um það sem betur má fara.
Tölvupóstfang réttindagæslu fatlaðs fólks er rettindagaesla@mannrettindi.is og almennt tölvupóstfang Mannréttindastofnunar Íslands er mannrettindi@mannrettindi.is.
Stoðþjónusta
Í sérstökum tilvikum skal veita einstaklingum með fötlun stoðþjónustu sem er nauðsynleg fyrir þátttöku þeirra í samfélagi án aðgreiningar þannig að þeir standi til jafns við aðra og komið verði í veg fyrir félagslega einangrun þeirra.
Umsókn um stuðnings- og stoðþjónustu kemur frá hinum fatlaða eða aðstandendum hans.
