Leikskólar

Innritun í leikskóla

Sækja um leikskóladvöl

Foreldrar/forráðamenn sækja um leikskólavist á umsóknavef Völu. Hægt er að sækja um leikskóla strax og kennitala barns hefur verið skráð.

Aðeins er hægt að innrita börn í leikskóla sem eiga lögheimili á Akranesi. Þeir sem hafa tekið ákvörðun um að flytja á Akranes geta sótt um þremur mánuðum fyrir flutning. Börnum fæddum til og með 31. maí 2024 stendur til boða að hefja leikskólavist haustið 2025. Innritað er í leikskóla í mars ár hvert og leikskóladvöl hefst að jafnaði að loknu sumarleyfi leikskólanna. 

Verklagsreglur um innritun í leikskóla 

Úthlutun á leikskólaplássi

Þegar barnið fær pláss á leikskóla færðu tölvupóst með boði um að staðfesta vistina hjá leikskólastjóra. Börn raðast á biðlista eftir kennitölu og röð á biðlista ræður hvaða barn fær boð um leikskólapláss. Eldri börn ganga fyrir yngri börnum. Börn sem falla undir skilgreiningu um forgang geta komist fyrr að.

Dvalartími

Leikskólarnir eru opnir frá kl. 07:45 til kl. 16:15. Dvalartími barns er skipulagður í samráði við leikskólastjóra og foreldra. Leikskólarnir bjóða upp á dvalartíma til kl.16:30 ef foreldrar fimm barna eða fleiri óska eftir dvöl á þeim tíma. Beiðni þar um skal liggja fyrir í byrjun skólaárs.

Lengri dvalartími

Ef dvalartími barns er umfram 08:00-16:00 er heimilt að kaupa 15 mínútur, þessi heimild er eingöngu virk ef foreldrar fimm eða fleiri barna óska eftir slíkri vistun. Kaup á dvalartíma innan 08:00 til 16:00 miðast við heila og hálfa klukkustundir. 

Leikskólinn Vallarsel býður upp á dvalartíma frá kl. 06:45 ef foreldrar fimm barna eða fleiri óska eftir dvöl á þeim tíma. Beiðni þar um skal liggja fyrir í byrjun skólaárs. Greitt er fyrir allan tímann á milli 06:45-08:00 (ein klukkustund og korter) og gjaldskrá fyrir þann tíma er utan hefðbundins leikskólagjalds sem leggst á dvalargjaldið.

Gert er ráð fyrir að daglegur dvalartími barns fari ekki yfir 8,5 klukkustundir á dag nema með fenginni undanþágu vegna sérstakra aðstæðna foreldra. 

Afslættir vegna styttri dvalartíma

Foreldrum stendur til boða að kaupa styttri dvalartíma og kemur þá til afslátta af gjöldum, og gildir þá ákvæði þessara verklagsreglna um gjaldská leikskóla Akraneskaupstaðar. 

Um keypta vistunartíma innan hefðbundins dagvinnutíma, 08:00 til 16:00, stendur foreldrum til boða þrepaskiptir afslættir sem fjallað er um í gildandi gjaldskrá hverju sinni. Afsláttur af gjaldi kemur fram á reikningi í næsta greiðslumánuði. Breyting á vistunartíma skal berast fyrir 20. dags mánaðar og gilda eigi skemur en þrjá mánuði.

Leikskólagjöld og afslættir

Leikskólagjöld eru innheimt samkvæmt gjaldskrá. 

Hér fyrir neðan má sjá Gjaldskrá Leikskóla Akraneskaupstaðar.

Gjaldskrá leikskóla

Afsláttur í boði

Foreldrum stendur til boða að kaupa styttri dvalartíma og kemur þá til afslátta af gjöldum, og gildir þá ákvæði þessara verklagsreglna um gjaldská leikskóla Akraneskaupstaðar.

Afsláttarleiðir sem foreldrar geta valið úr:

• • 25% afsláttur ef dvalartími er 7 klst. á dag (35 klst./viku)
  • 30% afsláttur ef dvalartími er 6,5 klst. á dag (32,5 klst./viku)
  • 35% afsláttur ef dvalartími er 6 klst. á dag (30 klst./viku)
  • 25% afsláttur ef vistun lýkur kl. 14:00 á föstudögum (38 klst./viku)

Við hvetjum foreldra til að skoða raunveruleg dæmi um afsláttarleiðirnar og frekari upplýsingar hér.

Önnur afsláttarkjör:

• • Einstæðir foreldrar - 35% afsláttur er veittur til einstæðra foreldra að fenginni umsókn foreldris. Umsókn um afsláttarkjör skal endurnýjuð árlega fyrir 15. ágúst og afhent leikskólastjóra í viðkomandi leikskóla. Ef breyting verður á hjúskaparstöðu sem hefur áhrif á afsláttarkjör þarf að tilkynna það til leikskólastjóra. Afslátturinn nær til dvalargjalds fyrsta barns.
  • Námsmenn - Ef báðir foreldrar eru í viðurkenndu námi, fá 35% afslátt af dvalargjaldi. Skila skal skólavottorði fyrirfram fyrir hverja önn þar sem fram koma upplýsingar um einingafjölda og staðfestingu á því að um fullt nám sé að ræða. Afsláttur námsmanna gildir ekki 1. júní til 31. ágúst, nema foreldrar séu í fullu sumarnámi. Afslátturinn nær til dvalargjalds fyrsta barns.
  • Systkinaafsláttur - Systkinaafsláttur gildir milli dagforeldra, leikskóla, frístundar og lengdrar viðveru fatlaðra nemenda í 5. - 10. bekk. Greitt er fullt gjald vegna yngsta barns og síðan koll af kolli.

• • • Yngsta barn greiðir fullt gjald
    • Annað systkini greiðir 50% af gjaldi
    • Þriðja systkini greiðir 25% af gjaldi

Afslættir reiknast í þessari röð:

1. Þrepaskiptur afsláttur vegna dvalartíma.

2. Afsláttur vegna hjúskaparstöðu og námsmanna.

3. Systkinaafsláttur.

Leiðandi vörður í leikskólastarfi á Akranesi

Breið samstaða ríkir til framtíðar um mikilvægustu markmiðin í skóla- og frístundastarfi á Akranesi.

Læsistefna leikskóla á Akranesi

Starfshópur um læsi í leikskólum á Akranesi vann sameiginlegar áherslur í málörvun og læsi fyrir leikskólabörn á Akranesi. Góður málþroski leggur grunn að lestrarnámi og læsi. 

Markmið með læsistefnunni er:

• • Að efla starfshætti leikskóla Akraneskaupstaðar með tilliti til undirritunar sáttmála um eflingu læsis. ​
  • Að gera átak í að efla málþroska og læsi í leikskólum Akraneskaupstaðar.
  • Að auka þekkingu starfsfólks á leiðum til að efla málþroska og læsi leikskólabarna.
  • Að samræma starfshætti og miðla þekkingu á milli leikskólanna.
  • Að auka þekkingu foreldra á hlutverki og mikilvægi þeirra í málörvun og lestrarnámi barna.
  • Að útbúa árganganámskrár fyrir málörvun og læsi í leikskóla.

Áherslur í málvörun og læsi fyrir foreldra

Læsisstefna leikskólanna á Akranesi

Samstarf leikskóla og grunnskóla - Brúum bilið

Grunnur að samstarfinu "Brúum bilið" á milli leikskóla og grunnskóla á Akranesi má rekja til ársins 1994. Starfið hefur verið með formlegum hætti frá árinu 1996 og hefur tekið nokkrum breytingum á þessum tíma eflst og batnað. Starfið er í mjög föstum skorðum í grundvallaratriðum en tekur smávægilegum breytingum milli ára því sjaldnast vinnur sama fólkið að því tvö ár í röð.

Tilgangurinn með verkefninu er:

• • Að skapa samfellu í námi barna / nemenda á þessum tveimur skólastigum.
  • Að byggja upp gagnkvæma þekkingu og skilning á starfi kennara á báðum skólastigum.
  • Að stuðla að vellíðan og öryggi barna við að fara úr leikskóla í grunnskóla.

Námskeið fyrir foreldra

Akraneskaupstaður býður upp á fjölbreytt námskeið fyrir foreldra og börn.

Á námskeiðunum eru kenndar árangursíkar aðferðir sem er ætlað að bæta líðan, hegðun og félagsfærni.

Með þessu má stuðla að góðum samskiptum innan fjölskyldunnar.

Tengjumst í leik - Invest in Play

Tengjumst í leik (e. Invest in play) er námskeið fyrir foreldra og forráðamenn barna þar sem áhersla er lögð á jákvæð samskipti og samveru foreldra og barna í gegnum leik. Með því myndast góð tengsl milli foreldra og barna og samband þeirra styrkist. Efni og innihald námskeiðsins er byggt á gagnreyndum aðferðum og rannsóknum á alþjóðlegum vettvangi.

Á námskeiðinu er foreldrum kenndar áhrifaríkar aðferðir sem auka sjálfsöryggi í uppeldishlutverkinu, ásamt því að stuðla að bættri núvitund og draga úr streitu, auka sjálfstjórn og skilning á eigin þörfum sem og þörfum barna sinna. Rannsóknir hafa sýnt að börn sem eiga foreldra sem setið hafa námskeiðið öðlast aukið sjálfstraust, tilfinningalæsi og félags- og námsfærni. Foreldrafræðslan Tengjumst í leik hefur því margþættan ávinning fyrir börn, foreldra og samfélagið í heild. Hún stuðlar að aukinni sjálfstrú foreldra, betri samskiptahæfni barna og dregur úr áhættuhegðun barna og unglinga.

Akraneskaupstaður er fyrsta sveitafélagið til þess að bjóða foreldrum leikskólabarna upp á námskeið án endurgjalds. Námskeiðið er unnið í samvinnu við þróunarverkefnið Föruneyti barna – samstarfs um stuðning við uppeldi og nám á vegum Menntavísindasviðs Háskóla Íslands og Barna- og menntamála ráðuneytisins. Nánar má lesa um verkefnið hér.

Markmið námskeiða er að valdefla foreldra í uppeldishlutverki sínu og efla um leið þjónustu við börn og foreldra. Á Akranesi verður foreldrum barna í leikskólum boðið að sækja námskeiðið. Foreldrum sem ætla að sækja námskeiðið er bent á að hafa samband við sinn Leikskólastjóra vegna vistunartíma ef þess er þörf.

Áhugasömum er bent á að hægt er að fylgja Invest in play á Instagram og á Facebook. Einnig má finna fróðlegar upplýsingar á heimasíðu þeirra.

„Að vera foreldri er flókið og maður fær ekki neina þjálfun í að vera slíkur, svo ég held að hvert foreldri ætti að hafa greiðan aðgang að þessum verkfærum“.

Faðir tveggja barna á aldrinum fimm og tíu ára.

SES - Samvinna eftir skilnað

Fagaðilar á velferðar- og mannréttindasviði bjóða upp á sérhæfða skilnaðarráðgjöf til foreldra barna á aldrinum 0-18 ára, ráðgjöfin kallast SES eða samvinna eftir skilnað en er ætluð öllum foreldrum sem eiga börn á tveimur heimilum.

Ráðgjöfin miðar að því að veita ráðgjöf og stuðning við foreldra sem eiga börn á tveimur heimilum og því geta foreldrar sem eru að skilja, eða hafa skilið eða slitið samvistum og vilja þiggja stuðning og ráðgjöf sett sig í samband við SES-ráðgjafa á velferðar- og mannréttindasviði Akraneskaupstaðar. Meginmarkmið SES verkefnisins er að vernda hagsmuni barnsins sem og að bæta andlega og líkamlega líðan foreldra og barns. Í gegnum SES öðlast foreldrar færni í að takast á við óvæntar uppákomur tengdar skilnaðinum/sambúðarslitum og einnig auka skilning sinn á viðbrögðum barna sinna við breytingunum.

Hér er hægt er að sækja um ráðgjöf hjá SES ráðgjöfum í íbúagátt Akraneskaupstaðar.

Frekari upplýsingar um SES verkefnið má finna á samvinnaeftirskilnad.is

Ráðgjöf og rafræn námskeið eru foreldrum að kostnaðarlausu.

SES námskeið fyrir foreldra, þar sem ítarlega er fjallað um áhrif skilnaðar á fjölskyldur, fer fram þegar lágmarks þátttaka næst. Hvert námskeið skiptist í þrjá áfanga sem fjalla um áhrif skilnaðar á foreldra, viðbrögð barna við skilnaði og samvinnu foreldra eftir skilnað.

Foreldrar sem hafa áhuga á að ská sig á hópnámskeið SES er bent á að senda tölvupóst á velferd@akranes.is