Fara í efni  

Leikskólar

Á Akranesi eru starfandi fjórir leikskólar sem starfa eftir lögum og reglugerðum um leikskóla sem og skólastefnu Akraneskaupstaðar. Mennta- og menningarmálaráðuneyti mótar uppeldisstefnu leikskóla í aðalnámskrá en sérhver leikskóli skipuleggur og starfar eftir sínum áherslusviðum og gerir eigin áætlanir sem byggja á markmiðum laga um leikskóla og aðalnámskrá. 

Samkvæmt lögum um leikskóla bera sveitarfélög ábyrgð á starfsemi leikskóla og skulu þau hafa forustu um að tryggja börnum leikskóladvöl.  Akraneskaupstaður ber ábyrgð á heildarskipan skólahalds í leikskólum sveitarfélagsins, þróun einstakra leikskóla, húsnæði og búnaði leikskóla, sérúrræðum leikskóla, sérfræðiþjónustu, mati og eftirliti, öflun og miðlun upplýsinga og á framkvæmd leikskólastarfs í sveitarfélagi. Leikskólinn er fyrsta skólastigið og er ekki skylda. Leikskólinn er fyrir öll börn sem eru yngri en sex ára.

Sviðsstjóri skóla og frístundasviðs er Dagný Hauksdóttir, sem jafnframt veitir nánari upplýsingar í tölvupósti og í síma 433-1000. Sviðsstjóri hefur umsjón með faglegu leikskólastarfi á Akranesi. Meðal verkefna sviðsstjóra er að hafa umsjón með sérfræðiþjónustu, biðlistum og innritun í skóla.   

Leikskólar á Akranesi

Akrasel er sex deilda skóli sem leggur áherslu á umhverfismennt, jóga og hollt mataræði. Nánari upplýsingar má sjá á heimasíðu skólans; http://www.akrasel.is/

Garðasel er sex deilda heilsuleikskóli með áherslu á hreyfingu, holla næringu, listsköpun í leik og starfi og jákvæð og uppbyggjandi samskipti. Nánari upplýsingar má sjá á heimasíðu skólans; https://www.gardasel.is/is 

Teigasel er þriggja deilda leikskóli þar sem unnið er að því að hvetja barnið til gagnrýninnar hugsunar og örva um leið sköpunar- og leikgleði þess. Nánari upplýsingar má sjá á heimasíðu skólans; http://teigasel.is/

Vallarsel er sex deilda leikskóli sem leggur áherslu á fjölbreytt tónlistarstarf, frjálsan leik og heimspekilegar samræður í allri þemavinnu. Nánari upplýsingar má sjá á heimasíðu skólans; http://www.vallarsel.is/

Verklagsreglur um innritun í leikskóla

Aðeins er hægt að innrita börn í leikskóla sem eiga lögheimili á Akranesi. Þeir sem hafa tekið ákvörðun um að flytja á Akranes geta sótt um þremur mánuðum fyrir flutning.  Innritað er í leikskóla á því ári sem börn verða tveggja ára og inntaka fer að jafnaði fram að loknu sumarleyfi leikskólanna. Börn sem að mati sérfræðinga hafa sérstaka þörf fyrir leikskóladvöl hafa forgang í leikskóla. Umsóknir um forgang eru teknar fyrir á fundi með sérfræðiþjónustu skóla. Með beiðni um forgang þarf að fylgja bréf frá sérfræðingum eða læknisvottorð. Reglurnar í heild sinni eru aðgengilegar hér

Foreldrar/forráðamenn sækja um leikskólavist í íbúagátt Akraneskaupstaðar. Hægt er að sækja um leikskóla strax og kennitala barns hefur verið skráð. Börn innritast í leikskóla eftir kennitölu, þau elstu fyrst

Læsisstefna leikskóla Akraneskaupstaðar

Þann 22. september 2015 skrifaði Regína Ásvaldsdóttir, þáverandi bæjarstjóri Akraneskaupstaðar, undir Þjóðarsáttmála um læsi. Í kjölfarið bókuðu bæjarráð Akraneskaupstaðar ásamt skóla- og frístundasviði vegna undirritunarinnar að áhersla yrði á mikilvægi þess að tryggja faglegt sjálfstæði skóla og sveitarfélaga hvað varðar val á aðferðarfræði í lestrarkennslu. ​Í framhaldi var tilnefndur starfshópur um læsi.  Í honum eru aðstoðarleikskólastjórar en þeir eru einnig sérkennslustjórar sinna skóla.

Markmiðið var að:

  • Að efla starfshætti leikskóla Akraneskaupstaðar með tilliti til undirritunar sáttmála um eflingu læsis. ​
  • Að gera átak í að efla málþroska og læsi í leikskólum Akraneskaupstaðar.
  • Að auka þekkingu starfsfólks á leiðum til að efla málþroska og læsi leikskólabarna.
  • Að samræma starfshætti og miðla þekkingu á milli leikskólanna.
  • Að auka þekkingu foreldra á hlutverki og mikilvægi þeirra í málörvun og lestrarnámi barna.
  • Að útbúa árganganámskrár fyrir málörvun og læsi í leikskóla.

Nú er mál til komið:

 

Samstarf leikskóla og grunnskóla - Brúum bilið

Sveitarstjórn skal koma á samstarfi leikskóla og grunnskóla. Nánar er greint frá samstarfinu í aðalnámskrá. Grunnur að samstarfinu "Brúum bilið" á milli leikskóla og grunnskóla á Akranesi má rekja til ársins 1994. Markmið samstarfsins er m.a. að tengja skólastigin saman, að skapa samfellu í námi og kennslu barna/nemenda og að stuðla að vellíðan og öryggi barna þegar þau fara milli skólastiga. 

Fannst þér efnið á síðunni hjálplegt?

   
Fara efst
á síðu
  • AkraneskaupstaðurDalbraut 4, 300 Akranes
    Kt: 410169-4449

    Persónuverndarstefna
  • 433 1000
    Skrifstofan er opin sem hér segir:
    Mánu- fimmtudaga kl. 09:00-15:00
    Föstudaga kl. 09:00-14:00