Grunnskólar

Á Akranesi eru starfandi tveir grunnskólar, Brekkubæjarskóli og Grundaskóli, með bekkjardeildum frá 1. til 10. bekk.

Hlutverk grunnskóla, í samvinnu við heimilin, er að stuðla að alhliða þroska allra nemenda og þátttöku þeirra í lýðræðisþjóðfélagi sem er í sífelldri þróun.

Skólarnir starfa eftir lögum og reglugerðum um grunnskóla og menntastefnu Akraneskaupstaðar auk þess sem þeir starfa hvor eftir sínum áherslum og stefnum.

Að hefja nám í Grunnskóla

Vegna innritunar barna fæddra árið 2020.

Öll börn fædd árið 2020 sem eru með lögheimili á Akranesi verða forskráð í sinn hverfisskóla í gegnum island.is, samkvæmt reglum Akraneskaupstaðar um innritun barna í grunnskóla.

Foreldrar þurfa því ekki sjálf að skrá börn sín í grunnskóla

Upplýsingar um hverfaskiptingu má nálgast hér fyrir neðan.

Ef foreldrar/forráðamenn hafa athugasemdir við innritun barna sinna eru þeir vinsamlega beðnir um að hafa samband við Maren Ósk Elíasdóttur, verkefnastjóra á mennta- og menningarsviði, í gegnum netfangið maren@akranes.isfyrir 10. apríl nk.

Sérstakur upplýsingapóstur verður sendur út varðandi skráningu í frístundaheimilin Brekkusel og Grundasel.

Innritun

Á því ári sem barnið þitt verður 6 ára færð þú póst í innhólfið þitt á þínum síðum á island.is. Innritun hefst í upphafi árs fyrir skólagöngu um haustið. Þú innritar barnið þitt á þínum síðum á island.is. Upplýsingar um innritun eru aðgengilegar um miðjan mars ár hvert. Samhliða innritun er hægt að sækja um frístundaheimili. Sótt er um frístundaheimili í gegnum Völu.

Þegar nær dregur vori mun sá skóli sem barnið þitt fékk skólavist í senda þér upplýsingar um skólastarfið framundan, mataráskrift og annað sem þú þarft að vita.

Reglur um innritun skólabarna, skólahverfi og flutning milli skóla

Skólahverfi

Á Akranesi eru reglur um innritun skólabarna, skólahverfi og flutning milli skóla. Akranesi er skipt í tvö svæði sem tilheyra annars vegar Brekkubæjarskóla og hins vegar Grundaskóla. Mörkin milli svæðanna liggja um Þjóðbraut og Faxabraut. Foreldrar nemenda sem hefja nám í grunnskóla hafa kost á því að innrita börn sín hjá riturum grunnskólanna í samræmi við skólahverfi eða sækja um á island.is.

Hvað á að taka með í skólann?

Það þarf að vera með skólatösku, nesti og sundföt þegar það á við. Börnin fara út í frímínútur tvisvar á dag og er því gott að þau séu klædd eftir veðri og jafnvel með auka föt í töskunni. Skólinn útvegar allar námsbækur, stílabækur og ritföng.

Hlutverk foreldra

Þú berð ábyrgð á námi barna þinna og ætlast er til að þú fylgist með náminu í samvinnu við barnið og kennara þess.

Ef barnið þarf frí frá skóla verður þú að sækja um leyfi fyrir því. Ef barnið er veikt þarftu að tilkynna það til skólans. Öll röskun á námi vegna fjarveru barnsins frá skóla er á þína ábyrgð, og verður þú að sjá til þess að barnið vinni það upp sem það kann að missa úr náminu.

Skóladagatal Grunnskólanna

Upplýsingar um starfstíma grunnskóla má nálgast á skóladagatali skólanna.

Skóladagatal Brekkubæjarskóla Skóladagatal Grundaskóla

Leiðandi vörður í skólastarfi á Akranesi

Breiða samstaða ríkir til framtíðar um mikilvægustu markmiðin í skóla- og frístundastarfi á Akranesi.

Akranesstrætó

Á Akranesi er gjaldfrjáls ferðamáti í boði fyrir alla íbúa.

Við hvetjum öll börn á Akranesi til þess að nýta sér virkan og umhverfisvænan ferðamáta.

Ferðaáætlun Akranesstrætó