Nýr sláttutraktor í bæinn

Garðyrkjudeild Akraneskaupstaðar hefur fest kaup á nýjum sláttutraktor. “Nú verður hægt að slá yfir þau svæði sem Vinnuskólinn sér um að slá einu sinni til tvisvar áður en hann hefst og einnig eftir að honum lýkur,” segir Jón Arnar Sverrisson garðyrkjustjóri. Vinnuskólinn hefst 11. júní og stendur til 13. ágúst en gras sprettur vel og lengi utan þess tímabils.

Traktorinn hefur þegar verið prufukeyrður en fyrsti sláttur ársins var mánudaginn 4. maí. Þá var gras slegið á nokkrum hringtorgum. Traktorinn reyndist mjög vel en það var Daníel Valdimarsson starfsmaður garðyrkjudeildar og þjónustumiðstöðvar sem vígði gripinn.