Leikskólinn Akrasel fagnar komu Bambahúss í Skógræktinni

Elsta deild leikskólans Akrasel fylgjast spennt með komu Bambahúsanna.

Í dag föstudaginn 25. ágúst var Bambahúsi sem leikskólinn Akrasel keypti fyrr í sumar komið fyrir í Skógræktinni.

Húsin verða notuð í umhverfismenntarvinnu og ævintýraferðir leikskólans. Þarna verður hægt að rækta grænmeti og blóm meðal annars. Börnin munu vera í aðalhlutverki í nýtingu hússins, þar munu þau hafast við að planta, vökva og passa upp á það sem ræktað verður í húsinu.

Elsti árgangur leikskólans var staddur í skógrækt þegar komið var með húsin og þau flutt á hellulagða stéttina þar sem þau munu standa. Mikil gleði og spenna fylgdi þessum degi bæði hjá starfsfólki og börnum.