Hvalfjarðargöng – lokanir um hvítasunnuhelgi og áætluð verklok

Hvítasunnuhelgin er mikil ferðahelgi og því mikilvægt að ferðalangar viti af lokun Hvalfjarðarganga vegna framkvæmda við nýja lýsingu.

Lokanir:

• Frá klukkan 21:30 fimmtudaginn 21. maí til klukkan 6:00 á föstudagsmorgun
• Frá klukkan 21:30 sunnudaginn 24. maí til klukkan 6:00 á mánudagsmorgun
• Frá klukkan 21:30 mánudaginn 25. maí til klukkan 6:00 á þriðjudagsmorgun

Opnanir:

• Aðfaranótt laugardags
• Aðfaranótt sunnudags

Framkvæmdir hafa staðið yfir í Hvalfjarðargöngum frá 7. apríl síðastliðnum. Unnið er að endurnýjun á öllum lýsingarbúnaði ganganna sem hefur verið í notkun frá því að göngin voru opnuð árið 1998.

Upphafleg verklok voru áætluð 29. maí og stefnir allt í að sú tímaáætlun muni standast, samkvæmt upplýsingum frá Vegagerðinni. Verkið er því á áætlun og í byrjun vikunnar var búið að taka niður 85% af gömlum strengjum. Þetta er mikið magn eins og sjá má á meðfylgjandi mynd.

Þá er unnið að ýmsum öðrum verkefnum, eins og að setja upp stiga og ljós í útskotum, draga strengi og tengja, vinna í töflurýmum og uppsetningu fleiri vinnuljósa.

Í þessari viku verður lokið við að taka niður gömlu ljósin og strengina og haldið áfram með vinnu á stigum, í útskotum og við töflur í tæknirýmum ásamt ýmsu fleiru.