Vatnsbúskapur betri - sundlaugar opnaðar á morgun

Veitur sendu frá sér tölvupóst til íbúa Akraness fyrr í dag þar sem fram kemur að tekist hefði að takmarka notkun á neysluvatni verulega um helgina. Úrkoma í gær og í dag hefði hjálpað til og staðan í Berjadalsá orðin ásættanleg fyrir íbúa og fyrirtæki. 

"Jaðarsbakkalaug og Guðlaug þurfa ekki að vera lokaðar og þrýstingur á dreifikerfi vatns er eðlilegur. Athugið að það tekur tíma að opna laugarnar að nýju og þær opna fljótlega eftir hádegi á morgun, miðvikudag," segir einnig í póstinum en íbúar eru beðnir að fylgjast með nánari tímasetningu varðandi opnun á Facebooksíðu Jaðarsbakkalaugar á morgun. 

Loks segir í póstinum frá Veitum: "Úrkoma næstu daga og vikur mun að mestu stjórna því hvort þurfi aftur að grípa til ráðstafana og við biðlum áfram til allra að fara vel með kalda vatnið og þá skiptir mestu að láta það ekki renna viðstöðulaust að óþörfu."