Borað eftir heitu vatni í haust

Veitur tilkynntu í byrjun árs að borað yrði eftir heitu vatni við Jaðarsbakka á árinu, en þegar í upphafi var ákveðið að ekki yrðu framkvæmdir á staðnum yfir sumarið til að íbúar gætu óáreittir notið verunnar á Langasandi.

Tímaáætlun gerir nú ráð fyrir að framkvæmdir við borplanið hefjist undir lok ágúst og byrjað verði að bora í október. Áður en framkvæmdir hefjast verður húsnæðið næst borplaninu ástandsskoðað. Þetta kemur fram á heimasíðu Veitna.

Það er vitað að á Akranesi er hiti í jörðu, en hingað til hefur ekki fundist vatn í sömu rannsóknarholum. Íslenskar orkurannsóknir hafa lagt til að rannsóknarhola verði boruð á Jaðarsbökkum þar sem líklegast er talið að hvoru tveggja finnist, jarðhiti og vatn.

Nánari upplýsingar er að finna í frétt á vef Veitna sem sjá má með því að smella hér.