Ný hjólreiðasýning á Akratorgi
Í dag var sett upp ný og stórskemmtileg hjólreiðasýning á Akratorgi undir yfirskriftinni "Minningar á hjólum". Það eru Akraneskaupstaður og Héraðsskjalasafn Akraness sem standa fyrir þessari lifandi sýningu, þar sem ljósi er varpað á hjólamenningu bæjarins í gegnum árin. Á sýningunni má sjá fjölbreyttar myndir sem fanga hversdagslíf, leik og ferðalög á hjólum.
Akranes hefur einstaka sérstöðu þegar kemur að hjólreiðum. Bærinn er flatlendur, vegalengdir stuttar og auðvelt að komast á milli staða á einfaldan og umhverfisvænan hátt. Þetta hafa fjölmargir íbúar nýtt sér í gegnum tíðina, en full ástæða er til að hvetja sem flesta til að vera duglegir við að nota þennan umhverfisvæna, hagkvæma og heilsueflandi fararmáta.
Inni á vef Ljósmyndasafns Akraness má finna upplýsingar um sýninguna og myndirnar sem á henni eru. Auk þess er þar að finna kort með skemmtilegum hjólaleiðum kaupstaðarins.
Við hvetjum bæjarbúa og gesti eindregið til að gera sér ferð á torgið og skoða sýninguna, en flestir ættu að kannast við einhver af þeim mörgu andlitum sem eru á myndunum.
Sérstakar þakkir fær Topp Útlit fyrir prentun og uppsetningu á Akratorgi, en á meðfylgjandi mynd má sjá starfsmenn vinna að uppsetningu sýningarinnar í dag.
