Örnefnaganga á Írskum vetrardögum
17.03.2016
Ljósmynd: Guðni Hannesson.
Landmælingar Íslands stóðu fyrir örnefnagöngu í blíðskaparveðri í dag í tilefni af Írskum vetrardögum. Það voru þau Rannveig Benediktsdóttir, Guðni Hannesson og Eydís Finnbogadóttir sem miðluðu af fróðleik sínum. Upphaf göngunnar var á Aggapalli þar sem sagðar voru sögur af Langasandi, Þjótnum, Jaðarsbökkum að ógleymdum Agga, sem pallurinn er nefndur eftir. Þaðan lá leiðin að Krossvíkurvita og síðan á Sólmundarhöfða þar sem göngumenn fundu fornan neysluvatnsbrunn innan um kúmenplöntur sem vaxa í miklu magni á höfðanum. Næst var gengið í kirkjugarðinn og sagðar sögur og endað við írska steininn.
Örnefnagangan markar upphafið að Írsku vetrardögunum sem standa yfir fram á sunnudag og eru nýjung í menningarlífi Akurnesinga.
