Litla kartöfluhátíðin vel sótt

Litla kartöfluhátíðin fór fram á safnasvæðinu í Görðum á laugardag í brakandi veðurblíðu, en fjölmargir lögðu þangað leið sína til að kaupa kartöflur og grænmeti beint frá bónda, hlusta á fyrirlestur um sögu kartöflunnar í Stúkuhúsinu og smakka kartöflukonfekt. Þetta er í fimmta sinn sem hátíðin er haldin.

Akranes var eitt sinn þekkt um allt land fyrir kartöflurækt og hátíðinni er ætlað að minna á það. Þannig mætast saga, ræktun, matarmenning og menningararfur í gegnum þessa merku nytjaplöntu. Á myndinni sem notuð var til að kynna hátíðina og er hér fyrir neðan má sjá Jón Sigurðsson (1870-1953) úða varnarlyfjum yfir kartöflugarð með handdælu, en myndin er trúlega tekin fyrir 1940.  

Árlega er fenginn fyrirlesari á hátíðina til að fræða gesti um kartöflur á einn eða annan hátt. Í ár var það Ingólfur Guðnason garðyrkjufræðingur, en Ingólfur er einn af frumkvöðlum lífrænnar ræktunar á Íslandi. Hann stofnaði ásamt eiginkonu sinni, Sigrúnu Elfu Reynisdóttur, garðyrkjustöðina Engi í Laugarási árið 1985. Þar stunduðu þau meðal annars lífræna ræktun og voru brautryðjendur í ræktun ferskra kryddjurta.

Erindi Ingólfs var afar áhugavert en í því rakti hann sögu kartöflunnar og lýsti því hvernig ræktun hennar barst frá Andesfjöllum Suður-Ameríku alla leið til Íslands. Einnig bauð hann gestum upp á dýrindis flatkökur úr kartöflum. "Uppskriftina" má finna hér neðst í fréttinni. 

Jarðepla-Jói kom með kartöflur frá Snartarstöðum og seldi í sínum sölubás og Selið grænmeti seldi kóralkál, spergilkál, blómkál og toppkál svo eitthvað sé nefnt. Allt ferskar afurðir beint frá bónda.

Listakonan Tinna Royal útbjó auk þess kartöflukonfekt fyrir gesti, bæði með myntu- og kókosbragði, en konfektið rann ljúft niður með kaffinu og fyrirlestri Ingólfs. Við þökkum þeim sem mættu á hátíðina kærlega fyrir komuna og hlökkum til næsta árs.