Gagnlegar upplýsingar fyrir nýja íbúa

Húsnæði

Á lóðasíðu Akraneskaupstaðar, www.300akranes.is, er hægt að sjá þær lóðir sem eru lausar til umsóknar. Umsóknir um byggingarlóð fara fram í gegnum síðuna.

• Sjá nánar um fyrirkomulag umsókna hér.

 Söluskrá fasteigna á Akranesi er hægt að sjá á fasteignasíðum Vísis og Mbl.is. 

Skólar

Innritun í leikskóla, frístundastarf og fleira fer fram í þjónustugátt Akraneskaupstaðar. 

Dagforeldrar eru sjálfstæðir verktakar en Akraneskaupstaður hefur umsjón og eftirlit með starfsemi þeirra ásamt því að sjá um ráðgjöf og upplýsingar til dagforeldra og foreldra.

• Sjá nánari upplýsingar um dagforeldra

  Leikskólar. Á Akranesi eru starfandi fjórir leikskólar sem starfa eftir lögum og reglugerðum um leikskóla sem og skólastefnu Akraneskaupstaðar. Aðeins er hægt að innrita börn í leikskóla sem eiga lögheimili á Akranesi. Þeir sem hafa tekið ákvörðun um að flytja á Akranes geta sótt um þremur mánuðum fyrir flutning. Innritað er í leikskóla á því ári sem börn verða tveggja ára og inntaka fer að jafnaði fram að loknu sumarleyfi leikskólanna.

• Sjá nánari upplýsingar um leikskóla

• Grunnskólar. Á Akranesi eru starfandi tveir grunnskólar, Brekkubæjarskóli og Grundaskóli, með bekkjardeildum frá 1. til 10. bekk. Skólarnir starfa eftir lögum og reglugerðum um grunnskóla og skólastefnu Akraneskaupstaðar auk þess sem þeir starfa hvor eftir sínum áherslum og stefnum. Báðir skólarnir bjóða upp á framúrskarandi stoðþjónustu við nemendur.

• Sjá nánari upplýsingar um grunnskóla Akraneskaupstaðar

  Fjölbrautaskóli Vesturlands á Akranesi var settur í fyrsta sinn haustið 1977. Nemendur við skólann hafa undanfarin ár verið 500 til 700 talsins, þar af um helmingur á stúdentsbrautum, um fjórðungur á iðnbrautum og um fjórðungur á öðrum námsbrautum. Skólinn býður upp á nám til stúdentsprófs, starfsbraut og fjölbreytt nám til starfsréttinda, meðal annars í húsasmíði, rafvirkjun, vélvirkjun og á sjúkraliðabraut.

• Sjá nánari upplýsingar um Fjölbrautarskóla Vesturlands

  Tónlistarskólinn á Akranesi býr við góðan aðbúnað til kennslu að Dalbraut 1 og býður upp á fjölbreytileika í skólastarfinu. Hlutverk Tónlistarskólans á Akranesi er að stuðla að öflugu tónlistarlífi, jafnframt því að vinna að aukinni hæfni, þekkingu og þroska einstaklinga.

• Sjá nánari upplýsingar um Tónlistarskólann

  Símenntunarmiðstöð Vesturlands rekur starfsemi sína á Akranesi að Suðurgötu 57. Hlutverk Símenntunarmiðstöðvarinnar er að auka þekkingu og stuðla að bættum búsetuskilyrðum á Vesturlandi með því að greina og svara menntunarþörf og hvetja til símenntunar í samvinnu við atvinnulíf og íbúa svæðisins. Ásamt því veitir Símenntununarmiðstöðin fjarnemum í háskólanámi kost á að taka próf í sinni heimabyggð.

• Sjá nánari upplýsingar um Símenntunarmiðstöðina Vesturlands

Háskólar. Á Vesturlandi er að finna tvo háskóla sem bjóða upp á fjölbreyttar námsleiðir á háskólastigi. Það eru Háskólinn á Bifröst og Landbúnaðarháskóli Íslands.

Íþróttir og tómstundir

Frístundaheimili.
Akraneskaupstaður starfrækir frístundaheimili fyrir börn í 1. - 4. bekk.

• Sjá nánari upplýsingar um starfsemi frístundaheimila

  Frístundamiðstöðin Þorpið.
  Vettvangur og starfsemi Þorpsins er frítími og forvarnir og er megináherslan lögð á barna- og unglingastarf. Innan Þorpsins eru Arnardalur, félagsmiðstöð fyrir 13 - 16 ára, Hvíta húsið, ungmennahús fyrir 16 - 25 ára, Dagstarf fyrir 10 - 12 ára og Frístundarheimilið Krakkasel, frístund fyrir 3. - 4. bekk.

• Sjá nánari upplýsingar um starfsemi Þorpsins

Tómstundaframlag.
Akraneskaupstaður styrkir frístundaiðkun allra barna og unglinga á aldrinum 6-18 ára sem hafa lögheimili á Akranesi. Við skráningu barna í þjónustugáttinni í gegnum skráningarkerfi Nóra er hægt að ráðstafa framlaginu og skipta því einnig á milli íþróttafélaga, æfi viðkomandi fleiri en eina grein.

• Sjá nánari upplýsingar um tómstundaframlag Akraneskaupstaðar

Íþróttahús.
Á Akranesi er boðið upp á fjölbreytt íþrótta- og tómstundastarf sem nær til allra aldurshópa. Tvö íþróttahús eru á Akranesi, annars vegar á Jaðarsbökkum og hins vegar við Vesturgötu 120.

• Sjá nánari upplýsingar um íþróttahús Akraneskaupstaðar

Sundlaugar.
Á Akranesi eru tvær sundlaugar, Jaðarsbakkalaug og Bjarnalaug, ásamt Guðlaug sem er heit laug staðsett í grjótgarðinum á Langasandi.

• Sjá nánari upplýsingar um sundlaugar á Akranesi

Hér má nálgast upplýsingar um starfsemi íþrótta- og tómstundafélaga ásamt virkum félagasamtökum á Akranesi.  

Menningarlíf

Á Akranesi er blómlegt menningarlíf allan ársins hring. Hægt er að sjá skrá  yfir viðburði hér.

Byggðasafnið að Görðum hefur á undanförnum árum skipað sér verðugan sess sem eitt helsta aðdráttarafl Akraness enda mikil upplifun að koma þangað, jafnvel fyrir þá sem hafa annars ekkert gaman af söfnum.

• Sjá nánari upplýsingar um Byggðasafnið að Görðum

Bókasafn Akraness er almenningsbókasafn og er rekið af Akraneskaupstað. Hlutverk þess er að veita fólki, bæði börnum og fullorðnum, greiðan aðgang að fjölbreyttum bókakosti og öðrum miðlunargögnum, þar á meðal tölvubúnaði og upplýsingum á tölvutæku formi. Barnahornið er sérlega notalegt og er aðstaða til fyrirmyndar.

• Sjá nánari upplýsingar um Bókasafn Akraness

Tónberg er glæsilegur tónleika- og ráðstefnusalur í húsnæði Tónlistarskólans á Akranesi, búinn fullkomnustu tækjum til hverskyns flutnings bæði á töluðu máli og tónlist.

• Sjá nánari upplýsingar um Tónberg og Tónlistarskólann á Akranesi

Akranesviti er reglulega er opinn og er hann notaður undir listsýningar og tónleikahald enda er hljómburður í vitanum einstakur.

• Sjá nánari upplýsingar um Akranesvita

Árlegir menningarviðburðir

• Í byrjun júlí ár hvert halda Skagamenn hátíðlega hina svokölluðu Írsku daga til að minnast hinnar keltnesku arfleifðar sinnar og gera sér glaðan dag um leið.
• Í lok október og byrjun nóvember ár hvert bjóða bæjaryfirvöld á Akranesi til menningarhátíðarinnar Vökudaga en tilgangur hátíðarinnar er að efla menningarlíf í bænum og lífga um leið upp á skammdegið.
• Norðurálsmótið er knattspyrnumót fyrir stráka í 7. flokki og fer fram á Akranesi um miðjan júní ár hvert. Yfir þúsund keppendur í rúmlega 100 liðum eru árlega á mótinu og síðustu árin hafa yfir 6.000 manns verið gestkomandi á Akranesi yfir mótsdagana.

Garðavellir er frístundamiðstöð rekin af Golfklúbbi Leynis. Þar er hægt að bóka sali fyrir ýmsa viðburði.

Bíóhöllin á Akranesi er eitt elsta kvikmyndahús landsins, byggt árið 1942. Fylgstu með nýjustu fréttum á Facebook síðu Bíóhallarinnar.

Verslun og þjónusta

Á Akranesi má finna alla helstu þjónustu og verslun.

Matvörubúðir, kaffihús, veitingahús, apótek, nytjamarkað, skemmtistaði, fataverslanir, gjafavöruverslanir, hárgreiðslustofur, snyrtistofur, vínbúð, gæludýraverslun, bankar, bakarí, handavinnuverslun, bókabúð, byggingavöruverslun, raftækjaverslanir, pósthús, bílaverkstæði, listagallerí o.s.frv.

Heilbrigðisþjónusta

Heilbrigðisstofnun Vesturlands á Akranesi er deildaskipt umdæmasjúkrahús og heilsugæslustöð að Merkigerði 9. Afgreiðsla og tímapantanir virka daga kl. 07:45 - 18:00 í síma 432 1000.

• Hér má finna upplýsingar um tannlæknastofur á Akranesi.
• Hér má finna upplýsingar um sjúkraþjálfun á Akranesi.

Samgöngur

Akranesstrætó
Á Akranesi er innanbæjarakstur/Akranesstrætó sem gengur alla virka daga frá 7.10 - 18.00, ekki er ekið um helgar. Frítt er í Akranesstrætó.

• Tímatafla og yfirlitskort af leiðarkerfi vagnsins er aðgengilegt hér

Strætó
Leið 57 gengur milli Akureyrar og Reykjavíkur og stoppar á sjö stöðum á Akranesi.

• Nánari upplýsingar um leiðatöflur og tímatöflur má nálgast á heimasíðu strætó og í síma 540 2700.

Sorphirða og endurvinnsla

Almenn sorphirða og söfnun úrgangs til endurvinnslu er í umsjón Terra að Höfðaseli 15. 

• Sjá nánari upplýsingar um sorphirðu og endurvinnslu

Búkolla er nytjamarkaður sem hefur verið starfandi á Akranesi síðan árið 2009. Þar er m.a. tekið við fatnaði, húsgögnum og öðrum húsbúnaði sem öðlast nýtt líf á öðrum heimilum.  

• Sjá nánari upplýsingar um Búkollu nytjamarkað

Endurvinnsla á flöskum og dósum fer fram í Fjöliðjunni að Smiðjuvöllum 9.

• Sjá nánari upplýsingar um starfsemi og opnunartíma Fjöliðjunnar og Búkollu

Aðrar hagnýtar upplýsingar (flutningstilkynning, dýrahald o.s.frv.)

Dýrahald.
Á Akranesi er bæði hunda- og kattahald leyft að uppfylltum skilyrðum sem kveðið er á um í samþykkt um hunda- og kattahald á Akranesi. Sækja þarf sérstaklega um leyfi fyrir hunda- og kattahaldi á Akranesi.

• Sjá nánari upplýsingar um dýrahald

• Hundasvæði
  Við Kalmansbraut er skilgreint hundasvæði þar sem hundum er sleppt lausum og þaðan er stutt í sjóinn til að leyfa þeim að leika og synda.

  Hér má sjá staðsetningu hundasvæðis

  Flutningstilkynningar fara í gegnum Þjóðskrá Íslands.

• Hér getur þú tilkynnt flutning

Veitur ohf. sér um rafmagn, vatnsveitu og fráveitu á Akranesi.