Farsældarráð Vesturlands stofnað
Í upphafi þessa mánaðar var skrifað undir samstarfsyfirlýsingu meðal sveitarfélaga og stofnana á Vesturlandi og Farsældarráð Vesturlands stofnað. Farsældarráð Vesturlands er annað farsældarráðið sem er stofnað á landinu og munu fleiri slík verða stofnuð á landsvísu. Ráðunum er ætlað að vera vettvangur fyrir svæðisbundið samráð um farsæld barna og þar eiga sæti fulltrúar svæðisbundinna þjónustuveitenda á vegum ríkis og sveitarfélaga.
Að samstarfinu standa Akraneskaupstaður, Borgarbyggð, Dalabyggð, Eyja-og Miklaholtshreppur, Grundarfjarðarbær, Hvalfjarðarsveit, Skorradalshreppur, Snæfellsbær og Stykkishólmsbær, Samtök sveitarfélaga á Vesturlandi, Lögreglan á Vesturlandi, Sýslumaðurinn á Vesturlandi, Svæðisstöð íþróttahéraða, Heilbrigðisstofnun Vesturlands, Ungmennaráð Vesturlands, Fjölbrautaskóli Vesturlands, Fjölbrautaskóli Snæfellinga og Menntaskóli Borgarfjarðar. Samstarfsyfirlýsingin tekur mið af tímabilinu 1.10.2025- 31.12.2026 og lagt er upp með áframhaldandi samstarfi að þeim tíma loknum.
Bára Daðadóttir verkefnastjóri farsældarmála hjá SSV mun halda utan um verkefnið á samningstímanum í samstarfi við þau sveitarfélög og stofnanir sem að samstarfsyfirlýsingunni standa.
