Uppbygging á Jaðarsbökkum
Þann 7. mars 2023 var undirrituð viljayfirlýsing milli Ísoldar fasteignafélags ehf. (Ísold), Íþróttafélags Akraness (ÍA), Knattspyrnufélags Í.A. (KFÍA) og Akraneskaupstaðar um uppbyggingu hótels, baðlóns og heilsulindar á Jaðarsbökkum Akranesi. Yfirlýsingin felur jafnframt í sér að Akraneskaupstaður úthluti Ísold lóðum fyrir 80-120 íbúðir á Akranesi sem eru bundnar því skilyrði að uppbygging Ísoldar á hóteli, baðlóni og heilsulind raungerist. Akraneskaupstaður og Ísold vinna nú að gerð samnings um úthlutun lóða fyrir íbúðirnar á Sementsreit.
Breyta þarf skipulagi á Jaðarsbakkasvæðinu til að gera ráð fyrir uppbyggingunni. Fengnar voru þrjár arkitektastofur, Basalt, Sei og Nordic, til að gera tillögu að skipulagi svæðisins og kynntu stofurnar hugmyndir sínar m.a. á opnum kynningafundi í Bíóhöllinni í október 2023. Upptaka frá fundinum er hér fyrir neðan. Á sama fundi voru kynntar tillögur að stefnumótun fyrir svæðið sem starfshópur með fulltrúum frá aðilum að viljayfirlýsingunni vann, en kynningu formans hópsins má einnig finna á upptökunni frá fundinum.
Út frá mati á tillögum arkitektastofanna lagði skipulags- og umhverfisráð til að gengið yrði til samninga við Basalt arkitekta um deiliskipulagsvinnu á Jaðarsbökkum, en tillaga Basalt að skipulagi svæðisins þótti uppfylla best kröfur og væntingar. Sei og Nordic voru með ýmsa góða punkta í sinni vinnu sem Akraneskaupstaður hefur heimild til að nýta inn í skipulagsvinnuna framundan. Bæjarstjórn samþykkti tillögu ráðsins á fundi sínum 28. nóvember 2023.
Vinna hófst í lok nóvember 2023 við aðal- og deiliskipulagstillögu fyrir Jaðarsbakkasvæðið. Akraneskaupstaður hefur hug á að vinna skipulagið í samstarfi við Ísold, ÍA og KFÍA, líkt og kemur fram í viljayfirlýsingunni, og því verða reglulegir fundir með aðilum frá Ísold, auk þess sem fulltrúum frá ÍA og KFÍA verður boðið á fundi skipulags- og umhverfisráðs. Stefnt er að því að skipulagsferlinu ljúki á þriðja ársfjórðungi 2024.
Í janúar 2024 var gerð samantekt fyrir skipulags- og umhverfisráð um framgang verkefnisins frá mars 2023 til janúar 2024, vinnu starfshóps um stefnumótun fyrir svæðið, ásamt helstu skrefum framundan í skipulagsferlinu.
