Fara í efni  

Umhverfisviðurkenning 2017

Árlega veitir Akraneskaupstaður einstaklingum og hópum umhverfisviðurkenningar.  2017 voru veittar viðurkenningar í eftirfarandi flokkum:

1)      Falleg einbýlishúsalóð - Þar sem horft er til umhirðu húss og lóðar, hönnunar og notkunarmöguleika.

2)      Snyrtileg fyrirtækjalóð - Þar sem horft er til umhirðu húss og lóðar, hönnunar og notkunarmöguleika.

3)      Hvatningarverðlaun - Eru veitt þeim sem hafa staðið að endurbótum bygginga og lóðar og vel hefur tekist til

4)      Tré ársins – Þar sem horft er til útlits og menningarlegs gildis einstakra trjáa

Óskað var eftir tillögum frá íbúum Akraness og valnefnd fengin til starfa til að koma einnig með tillögur.  Í nefndinni voru Helena Guttormsdóttir lektor og brautarstjóri umhverfisskipulags hjá Landbúnaðarháskóla Íslands, Jón Guðmundsson garðyrkjufræðingur og Belinda Eir Engilbertsdóttir landslagsarkitekt.  Ákveðið var að velja eftirfarandi lóðir og verkefni í samráði við Skipulags-og umhverfisráð

 

1)      Hvatningarverðlaun

Mánabraut 9 og Mánabraut 11

Ákveðið var að veita Hallveigu Skúladóttur og Stefáni Jónssyni viðurkenningu fyrir endurbætur á Mánabraut 9 og Mánabraut 11.

Um er að ræða fallegar og vel heppnaðar endurbætur á húsum og lóðum. Tekist var á við endurgerð tveggja ólíkra húsa af virðingu fyrir upprunalegum byggingarstíl. Heilmúrun eða einangrun og litaval á Mánabraut 11, sem var í mikilli niðurníðslu, er vel heppnað og næmi fyrir smáatriðum í handriðum og gluggaumgjörð á báðum húsum slær frísklegan hvatningartón í götu sem er á framtíðar miðsvæði og býr yfir miklum tækifærum.

 

2)      Snyrtileg fyrirtækjalóð

Heilbrigðisstofnun Vesturlands á Akranesi hefur verið framúrskarandi þegar kemur að viðhaldi og umhirðu bygginga og lóða sinna og eru öðrum til mikillar fyrirmyndar. Aðkoma lóðar er opin úr öllum áttum, gróðurval er einfalt og llóðin vel hirt, bekkir og rusladallar eru ágætlega staðsettir og það er aðgengi fyrir alla.

Hönnun lóðarinnar er einföld en býður þó upp á fjölbreytta sjónræna hluti. Limgerði og stígar liggja á áhugaverðan hátt í gegnum lóðina, einföld lýsing á húsvegg gerir mikið fyrir árstíðarbundna upplifun, fallegt útilistaverk er mikil prýði og laðar að alla aldurshópa, hlaðinn veggur á bílastæði og hlaðnar eyjur með fláa brjóta upp sléttan stóran flöt.

 

3)      Falleg einbýlishúsalóð

Dalsflöt 1Ákveðið var að veita Unni Guðmundsdóttur og Val Heiðari Gíslasyni viðurkenningu fyrir fallega einbýlishúsalóð á Dalsflöt 1

Unnur og Valur hafa lyft grettistaki á skömmum tíma á Dalsflöt 1.  Þau hafa sinnt viðhaldi og umhirðu húss og lóðar frá upphafi með miklum sóma og eru öðrum til mikillar fyrirmyndar.  

Útfærsla lóðarinnar er sérstaklega áhugaverð fyrir þær sakir að tenging á milli einka og almenningsrýmis er afar vel heppnuð. Fjölbreytt val fjölæringa og þekjuplantna, runna-og trjágróðurs eykur sjónræn gæði göturýmis í lit og formi og er gott mótvægi við „sjónsteyptan“ vegg sem veitir aftur íbúm skjólgott og afmarkað útirými.

 

4)      Tré ársins

hlynur á Vesturgötu 42Í ár ákvað Akraneskaupstaður að veita umhverfisverðlaun fyrir tré ársins í annað skipti og fyrir valinu varð einkar fallegur hlynur við Vesturgötu 42. Íbúar og eigendur lóðar við Vesturgötu 42 eru í dag Steinþóra Guðrún Þórisdóttir og Baldvin Kristjánsson og Magnús Vagn Benediktsson.

Hlynurinn stendur fyrir aftan húsið á Vesturgötu, þétt upp við mosagróinn vegg sem afmarkar lóðamörkin á milli Vesturgötu 42 og Vitateigs 1. Líklegast er um Garðahlyn að ræða og eru einhverjar tilgátur um að hann hafi verið gróðursettur um 1958, en þá bjuggu í húsinu hjónin Niels Finsen og Jónína Finsen.

Tréð er einstofna, fallegur einstaklingur og fyllir trjákrónanan nær alla lóðina og yfir á þá næstu.  „Algjört augnakonfekt, stórt og kröftugt. Því miður sést það ekki frá götu en við í aðliggjandi lóðum baka til við húsið njótum fegurðar þess“, var m.a. sagt um tréð þegar það var tilnefnt.

Hlynurinn á Vesturgötu sýnir vel að fjölbreyttar tegundir þrífast í bænum. Íslendingar þekkja helst garðahlyn sem hefur verið ræktaður í görðum á aðra öld. Tegundin fær á sig stóra og hvelfda krónu og því þarf að búa henni gott rými og hugsa til þess frá upphafi svo hún njóti sín til fulls.

Fannst þér efnið á síðunni hjálplegt?

   
Fara efst
á síðu
  • Akraneskaupstaður 433 1000
  • Skrifstofan er opin alla virka daga kl. 09:30 - 12:00 og 12:30 - 15:30
  • Stillholti 16-18, 300 Akranes
    Kt: 410169-4449