Ég setti þetta innleg inn á facebooksíðuna góðu "Ég er íbúi á Akranesi" í morgun. Mér var bent á að senda það á þetta netfang, til að koma áskorun minni í réttan farveg.
-- Gisting erlendra ferðamanna á bílastæðum og opnum svæðum í byggð er orðin algeng sjón á Íslandi. Þessi bíll stóð í fyrrinótt á bílastæðinu við Bíóhöllina. Að sögn sjónarvotta gistu þarna 6 manns, sem notuðu síðan fjöruna fyrir neðan sem salerni. Gestir sem kjósa þennan gistimáta velja sér gjarnan staði með "milljón dollara útsýni", en vilja ekki greiða neitt fyrir gistingu. Þetta háttalag ferðamanna er oftast ekki vel séð af íbúum og er það mjög eðlilegt, þar sem oftast eru tjaldstæði og aðrir gistimöguleikar í boði. Miðað við ástandið í ferðaþjónustu á Íslandi t.d. hvað varðar fjölda ferðamanna og vegna sterks gengis krónunnar, þá má búast við að svona lagað eigi bara eftir að aukast. Hér þarf bæjarfélagið að skerast í leikinn og setja reglur um það hvar þetta má og hvar ekki. Auðveldast væri að setja upp bannskilti á vinsælum náttstöðum, þar sem einnig væri bent á tjaldstæðið við Kalmansvík. Ef ekkert verður aðhafst, þá mun þetta háttalag valda núningi á milli ferðamanna og íbúa og það viljum við auðvitað ekki, þar sem framtíðaruppbygging ferðaþjónustu í bænum er í húfi. Ég skora því á bæjaryfirvöld að taka af skarið!
Katla DMI ehf. & Viator Summerhouses GmbH