Stofnun Landssamtaka menntasmiðja

Landssamtök menntasmiðja verða stofnuð á Akranesi föstudaginn 26. apríl næstkomandi. Stofnaðilar samtakanna eru 7; Framvegis; miðstöð um símenntun í Reykjavík, Fræðslumiðstöð Vestfjarða, Fræðslumiðstöð Norðurlands-Vestra, Fræðslumiðstöð Þingeyinga, Menntasmiðjan á Akureyri, Símenntunarmiðstöðin á Vesturlandi og Svæðisvinnumiðlun Austurlands.

Menntasmiðjur eru nýr valkostur í námi á Íslandi og eru sniðnar að fyrirmynd lýðskóla, þar sem lögð er áhersla á ábyrgð nemenda á náminu og að þeir hafi áhrif á innihald þess. Í menntasmiðjum er fjölbreytileiki í efni og aðferð í fyrirrúmi og eru námsgreinarnar ýmist hagnýtar eða skapandi og er  sjálfsstyrking auk þess rauði þráðurinn í náminu.

Á ?Opnu húsi? Menntasmiðjunnar Elínar sama dag verður nám í menntasmiðju kynnt í bundnu og óbundnu máli, með sýningarhaldi og uppákomum. Dagskráin hefst kl. 17:00 að Skólabraut 9, Akranesi.

Menntasmiðjur hafa verið reknar á Akureyri tvisvar á ári frá árinu 1994, sú næsta reis í Skagafirði árið  1999 og síðar hafa Akranes, Austfirðir og Ísafjörður bæst í hópinn. Til þessa hafa menntasmiðjur á Íslandi aðallega verið fyrir konur, sem standa á tímamótum í lífi sínu. Æskilegur námstími eru 4 mánuðir, en víða hafa þær verið styttri.  Nú á vorönn 2002 er í fyrsta sinn starfandi menntasmiðja fyrir ungt fólk á Akureyri. Þær menntasmiðjur sem eru í bígerð eru ýmist fyrir konur, ungt fólk eða blandaða hópa.