Fara í efni  

Horft úr Brúnni

Nú fer í hönd sá tími ársins, jólin og áramótin, þegar börnin okkar þurfa hvað mest á stuðningi, fræðslu og aðhaldi foreldra sinna að halda. Um jól og sérstaklega áramót hefur sú þróun orðið að börn og unglingar eru lengur úti, sumir hverjir fram undir morgun þrátt fyrir ungan aldur. Unglingar safnast gjarnan saman eftir miðnætti á gamlárskvöld og hafa þá jafnvel vímuefni um hönd. Þess vegna viljum við hvetja foreldra til að sýna ábyrgð og við minnum á að reglur um útivistartíma barna og ungmenna eru í fullu gildi ? líka um jól og áramót.

 


Í barnaverndarlögum kemur fram að frá 1. september til 1. maí megi börn, 12 ára og yngri, ekki vera á almannafæri eftir kl. 20 nema í fylgd með fullorðnum. Börn á aldrinum 13 til 16 ára mega ekki vera á almannafæri eftir kl. 22, nema þau séu á heimleið frá viðurkenndri skóla-, íþrótta- eða æskulýðssamkomu. Svo virðist  sem foreldrar slaki á útivistarreglunum bæði  þegar barnið eldist en einnig í skólafríum.  Við það getur hætta á áhættuhegðun barnsins aukist eins og t.d. fikt með áfengi eða aðra vímugjafa.


Reglur um útivistartíma barna og unglinga eru fyrst og fremst settar til að vernda börnin okkar. Það er margsannað að eftirlitslaus börn eru líklegri en önnur börn til að byrja að reykja og prófa áfengi eða önnur vímuefni. Jafnframt er þeim hættara en öðrum til að verða fórnarlömb eða gerendur ofbeldisverka eða afbrota.


 


Forvarnir heimilanna miðast að því að styrkja unglingana strax frá unga aldri til að standast félagaþrýsting, efla sjálfstraust þeirra og félagslega færni eins og að kenna þeim að hafa eðlilegt samneyti við jafnaldra sína án þess að finnast þeir þurfa að vera í vímu. Það er á ábyrgð forráðamanna að sýna börnum sínum festu og aðhald. Að vera foreldri er 18 ára ábyrgð.


 


Góð samskipti foreldra og barna og góðar samverustundir eru besta forvörnin hvað varðar hættuna á að barnið leiðist út í áfengis- eða vímuefnaneyslu. Ýmsar kannanir sýna að börn og unglingar vilja verja meiri tíma með foreldrum sínum heldur en þau eiga kost á í dag. Jólin og áramótin eru tími  tækifæra fyrir fjölskylduna að verja meiri tíma saman og safna góðum minningum.


 


Brúin er formlegur samráðs- og samstarfsvettvangur starfsmanna og stofnana sem koma að ýmsum málum sem tengjast unglingum í sveitarfélaginu.


   
Fara efst
á síðu
  • AkraneskaupstaðurStillholti 16-18, 300 Akranes
    Kt: 410169-4449
  • 433 1000
    Skrifstofan er opin sem hér segir:
    Mánu- fimmtudaga kl. 09:00-15:00
    Föstudaga kl. 09:00-14:00