Fara í efni  

Grasrótarviðurkenning til Knattspyrnufélags ÍA

Á nýafstöðnu ársþingi KSÍ var Knattspyrnufélagi ÍA veitt grasrótarviðurkenning fyrir Norðarálsmótið, sem haldið er af félaginu.  Þetta er afar ánægjuleg viðurkenning, en í fyrra fékk félagið jafnréttisviðurkenningu frá KSÍ. 


Eins og fram kemur á vefsíðu KFÍA er þessi grasrótarviðurkenning ánægjuleg og mikilvæg viðurkenning til allra þeirra sem lagt hafa félaginu lið við undirbúning og framkvæmd Norðurálsmótsins - en þeir aðilar skipta hundruðum á ári hverju.  Norðurálsmótið er ekki aðeins mikilvæg tekjuöflun félagsins heldur einnig menningar- og íþróttaviðburður á landsvísu.  Þúsundir barna og foreldra þeirra koma til Akraness til þess að njóta hollrar íþróttaiðkunar og útiveru á Skaganum - og bæjarfélagið nýtur þessarar vinnu einnig í ríkum mæli.  Ekki er öllum ljós sú mikla vinna sem þessu fylgir og mikilvægi þessa verkefnis - en viðurkenningin varpar einmitt góðu ljósi á hversu gott starf þarna er unnið af KFÍA, foreldrum og velunnurum.  Þau Gísli Gíslason, formaður KFÍA og Sigrún Ríkharðsdóttir veittu viðurkenningunni móttöku á nýliðnu ársþingi KSÍ, en Geir Þorsteinsson formaður KSÍ afhenti viðurkenninguna.


Þær viðurkenningar sem KFÍA hefur fengið á síðustu tveimur ársþingum KSÍ er mikil hvatning til þess að halda áfram á þeirri braut að tryggja sem besta umgjörð knattspyrnuiðkunar á Akranesi - fyrir börn og unglinga - stelpur og stráka.  Margt hefur áunnist en mörg verkefni eru einnig framundan.  Í hönd fer mikilvægt ár í sögu félagsins á 100 ára afmæli Íslandsmótsins í knattspyrnu, en ÍA mun væntanlega leika sinn eittþúsundasta deildarleik á árinu og 60 ár eru nú frá því að fyrsti Íslandsmeistaratitillinn vannst í meistaraflokki.  Það er því spennandi ár framundan og með verðugri viðurkenningu eiga leikmenn allra flokka, starfsmenn, þjálfarar, stjórnafólk og stuðningslið að geta öll gengið léttstíg og stolt til góðra verka. Ástæða er til að taka undir þessi orð og óska knattspyrnufólki á Akranesi til hamingju með þessa viðurkenningu.


 

 


   
Fara efst
á síðu
  • AkraneskaupstaðurStillholti 16-18, 300 Akranes
    Kt: 410169-4449
  • 433 1000
    Skrifstofan er opin sem hér segir:
    Mánu- fimmtudaga kl. 09:00-15:00
    Föstudaga kl. 09:00-14:00