HEIMA-SKAGI hlýtur menningarverðlaun Akraneskaupstaðar 2026
Mennta- og menningarráð hefur ákveðið að veita tónlistarhátíðinni HEIMA-SKAGA menningarverðlaun Akraneskaupstaðar árið 2026 fyrir framúrskarandi framlag til menningarlífs bæjarins. Þetta var tilkynnt á setningarhátíð Vökudaga fyrr í dag þar sem Liv Áse Skarstad formaður mennta- og menningarráðs afhenti Ólafi Páli Gunnarssyni verðlaunin, en þetta er í 20. sinn sem þau eru afhent.
Frá því hátíðin var fyrst haldin árið 2019 hefur HEIMA-SKAGI fest sig í sessi sem einn af eftirtektarverðustu tónlistarviðburðum bæjarins. Hátíðin hefur vaxið jafnt og þétt og orðið ómissandi hluti af Vökudögum, þar sem hún laðar að sér tónlistaráhugafólk nær og fjær og auðgar menningar- og mannlíf bæjarins.
Á bak við hátíðina stendur Ólafur Páll Gunnarsson, sem hefur af eldmóði, metnaði og ástríðu fyrir tónlist leitt verkefnið frá upphafi. Með skýrri sýn og óþreytandi vinnu hefur honum tekist að skapa vettvang þar sem fjölbreytt tónlist fær að njóta sín og þar sem áhorfendur upplifa tónlist í einstakri nálægð við flytjendur. Undir hans stjórn hefur HEIMA-SKAGI þróast í rótgróinn og virtan viðburð sem hefur styrkt menningarlíf á Akranesi ár eftir ár.
En árangur hátíðarinnar er jafnframt afrakstur samheldins samfélags. Mennta- og menningarráð vill því ekki síður þakka öllum þeim fjölmörgu einstaklingum og fyrirtækjum sem hafa lagt HEIMA-SKAGA lið í gegnum árin. Fólki sem hefur opnað heimili sín fyrir tónlistinni, fyrirtækjum sem hafa lagt til húsnæði og aðstöðu, sjálfboðaliðum sem hafa lagt hönd á plóg og öllum þeim sem hafa tekið þátt í að skapa þá einstöku stemningu sem einkennir hátíðina. Án þessarar samvinnu og gestrisni væri HEIMA-SKAGI ekki sú hátíð sem hún er í dag.
HEIMA-SKAGI hefur jafnframt staðið fyrir fjölbreyttri dagskrá þar sem ólíkar tónlistarstefnur og listamenn fá notið sín. Hátíðin hefur skapað mikilvægan vettvang fyrir bæði þekkt tónlistarfólk og nýjar raddir og stuðlað að fjölbreyttu menningarframboði fyrir íbúa Akraness og gesti bæjarins.
Með verðlaununum vill mennta- og menningarráð heiðra þann metnað, frumkvæði og samfélagsanda sem býr að baki HEIMA-SKAGA. Hátíðin sýnir með skýrum hætti hvernig samvinna einstaklinga, heimila, fyrirtækja og listafólks getur skapað verkefni sem hefur varanleg áhrif á menningarlíf samfélagsins.
Mennta- og menningarráð telur að HEIMA-SKAGI hafi auðgað menningarlíf Akraness með eftirtektarverðum hætti og orðið tákn um þá samvinnu, sköpunarkraft og gestrisni sem einkenna bæjarfélagið. Ráðið telur því HEIMA-SKAGA og forsprakka hennar, Ólaf Pál Gunnarsson, verðuga handhafa menningarverðlauna Akraneskaupstaðar árið 2026.
Við óskum Ólafi Páli og öðrum þeim sem hafa lagt sín lóð á vogarskálarnar til að gera HEIMA-SKAGA að veruleika undanfarin ár hjartanlega til hamingju með menningarverðlaunin.
Fréttasafn
- 2026
- janúar febrúar mars apríl maí júní júlí ágúst september október nóvember
- 2025
- janúar febrúar mars apríl maí júní júlí ágúst september október nóvember desember
- 2024
- janúar febrúar mars apríl maí júní júlí ágúst september október nóvember desember
- 2023
- janúar febrúar mars apríl maí júní júlí ágúst september október nóvember desember
- 2022
- janúar febrúar mars apríl maí júní júlí ágúst september október nóvember desember
- 2021
- janúar febrúar mars apríl maí júní júlí ágúst september október nóvember desember
- 2020
- janúar febrúar mars apríl maí júní júlí ágúst september október nóvember desember
- 2019
- janúar febrúar mars apríl maí júní júlí ágúst september október nóvember desember
- 2018
- janúar febrúar mars apríl maí júní júlí ágúst september október nóvember desember
- 2017
- janúar febrúar mars apríl maí júní júlí ágúst september október nóvember desember
- 2016
- janúar febrúar mars apríl maí júní júlí ágúst september október nóvember desember
- 2015
- janúar febrúar mars apríl maí júní júlí ágúst september október nóvember desember





