Akraneskaupstaður vill taka þátt í sameiginlegu átaki gegn verðbólgu

Bæjarfulltrúar Akraneskaupstaðar lýsa yfir vilja sínum til að taka þátt í sameiginlegu átaki sveitarfélaga og ríkis gegn verðbólgu. Stefnt er að því að almennar hækkanir á gjaldskrám bæjarins verði ekki meiri en 2,5% að því gefnu að ríkið og önnur sveitarfélög taki einnig þátt.

Næsti fundur bæjarráðs fer fram 12. október og verður málið lagt þar fram. Bæjarfulltrúar vilja þó þegar í stað koma vilja sínum til þátttöku á framfæri, svo skýrt sé að Akraneskaupstaður sé reiðubúinn að leggja sitt af mörkum til þessa sameiginlega verkefnis.

Vilji bæjarfulltrúa er í samræmi við ályktun landsþings Sambands íslenskra sveitarfélaga. Gert er ráð fyrir að markmiðið verði haft að leiðarljósi við gerð fjárhagsáætlunar.