Fara í efni  

Aukning útlána í Bókasafni Akraness

Ársskýrsla Bókasafns Akraness fyrir árið 2002 er komin út. Í skýrslunni kemur meðal annars fram að útlán á árinu voru um 60.000. Væri útlánunum jafnað niður á íbúana hefði hver íbúi fengið um tíu safngögn að láni á árinu. Útlán jukust um 3000 frá árinu áður. Lán til barna voru um fimmti hluti útlána. Virkir lánþegar voru um 2.600 og gestakomur um 160 á dag.

Safnkosturinn taldi í lok ársins rúmlega 54.000 eintök. Þar af eru um 4.000 eintök í Haraldssafni. Safnkosturinn er fjölbreyttur og sem dæmi má nefna að reglulega berast safninu um níutíu tímarit. Einnig er safnið áskrifandi að gagnagrunninum hvar.is þar sem aðgangur er að fjölda gagnasafna.



Helsta nýbreytni í starfi safnsins á árinu var sú að haustið 2002 hófst í húsakynnum þess fjarkennsla á vegum Símenntunarmiðstöðvar Vesturlands. Starfsfólk bókasafnsins hefur umsjón með búnaði fjarkennslunnar en honum var komið fyrir í Svöfusal. Salurinn er kenndur við Svöfu Þorleifsdóttur sem var skólastjóri Barnaskóla Akraness um árabil. Sextán nemendur stunda nú háskólanám í Svöfusal.



Bókasafn og skjalasafn voru formlega aðskilin í lok ársins, en starfa áfram í sama húsnæði.
 
Það er einnig nýbreytni að frá 1. október var bókasafnið opið á laugardögum frá kl.11-14. Þess má geta að fræðimenn og skólanemendur nýttu sér í auknum mæli vinnuaðstöðu á lessal safnsins á síðasta ári.


   
Fara efst
á síðu
  • AkraneskaupstaðurStillholti 16-18, 300 Akranes
    Kt: 410169-4449
  • 433 1000
    Skrifstofan er opin sem hér segir:
    Mánu- fimmtudaga kl. 09:00-15:00
    Föstudaga kl. 09:00-14:00