Fara í efni  

Árni Múli Jónasson ráðinn bæjarstjóri á Akranesi

Á fundi bæjarráðs Akraness í dag, 29. júlí 2010, var samþykkt samhljóða  að leggja til við bæjarstjórn Akraness að Árni Múli Jónasson lögfræðingur verði ráðinn í starf bæjarstjóra á Akranesi til næstu fjögurra ára.
Alls sóttu 42 um starf bæjarstjóra á Akranesi, en 3 drógu umsókn sína til baka. Capacent Ráðgjöf hafði umsjón með ráðningarferlinu. Umsóknir voru metnar með tilliti til þeirra hæfniskrafna með fram komu í auglýsingu um starfið og ítarleg viðtöl voru tekin við valinn hóp umsækjenda. Ráðgjafi Capacent ásamt bæjarráði Akraness tók framhaldsviðtöl við þá sem þóttu best uppfylla hæfniskröfur.   Þegar öllum viðtölum var lokið hittist bæjarráð að nýju og fór yfir niðurstöður viðræðnanna.  Það var samhljóða niðurstaða bæjarráðs að leggja til við bæjarstjórn að Árni Múli Jónasson verði ráðinn í starfið.
Árni Múli er 51 árs gamall, lögfræðingur  að mennt, með meistarapróf í alþjóðlegum mannréttindalögum frá háskólanum í Lundi í Svíþjóð. Hann er kvæntur Arnheiði Helgadóttur sérkennara og eiga þau fjögur börn.  Þau hafa verið búsett á Akranesi síðan árið 2006 og þekkir Árni Múli því vel til á Akranesi.
Árni Múli hefur starfað sem fiskistofustjóri frá árinu 2009, en áður var hann m.a. lögfræðingur hjá umboðsmanni Alþingis, skrifstofustjóri í sjávarútvegsráðuneytinu og aðstoðarfiskistofustjóri þar til hann tók við starfi fiskistofustjóra.
Bæjarráð Akraness þakkar öllum umsækjendum fyrir áhugann sem þeir sýndu starfi bæjarstjóra. 


 

 


   
Fara efst
á síðu
  • AkraneskaupstaðurStillholti 16-18, 300 Akranes
    Kt: 410169-4449
  • 433 1000
    Skrifstofan er opin sem hér segir:
    Mánu- fimmtudaga kl. 09:00-15:00
    Föstudaga kl. 09:00-14:00