Fara í efni  

Akranes tengist leiðakerfi Strætó


-rúmlega 80 ferðir á viku á milli Reykjavíkur og Akraness


 


Í dag verður brotið blað í samgöngumálum á Vesturlandi en þá verða undirritaðir samningar um almenningssamgöngur á milli Reykjavíkur og Akraness, en þessir samningar hafa verið í burðarliðnum um nokkurt skeið. Annars vegar verður undirritaður samningur á milli Akraneskaupstaðar og Vegagerðarinnar um almenningssamgöngur á milli Reykjavíkur og Akraness og hins vegar verður undirritaður samningur Akraneskaupstaðar og Strætó bs. um tengingu Akraness við leiðakerfi Strætó, sem kemur til með að valda byltingu í samgöngum á Suð-Vesturlandi.

 


Frá og með áramótum mun leiðakerfi  Strætó bs. tengjast Akranesi en boðið verður upp á yfir 80 ferðir á viku á milli Akraness og Reykjavíkur. Þetta mun hafa í för með sér byltingu í samgöngumálum fyrir Skagamenn og þá sem vilja heimsækja Akranes frá Reykjavík. Um leið hættir gjaldið í Hvalfjarðargöng að vera sá farartálmi sem það hefur verið fyrir þá sem vilja heimsækja Skagann þar sem sama gjald mun gilda í Strætó, hvort heldur sem leiðin liggur á Skagann eða í Skerjafjörð, í Laugarnesið eða á Langasand.


 


Sem dæmi má nefna að háskólanemar geta stundað nám í Reykjavík en búið á Akranesi; ferðin frá Akranesi að aðalbyggingu Háskóla Íslands tekur t.d. um eina klukkustund með Strætó. Skagamenn geta tekið Strætó og skroppið í bíó og heim aftur að því loknu, farið út að borða í miðborg Reykjavíkur, farið í Kringluna eða til læknis og átt vísa ferð til baka, enda er Strætó í ferðum á milli Reykjavíkur og Akraness á u.þ.b. klukkustundar fresti alla virka daga og um helgar líka.


 


Sömuleiðis geta borgarbúar stigið upp í vagninn á næstu stoppistöð og verið komnir upp á Skaga skömmu síðar. Þetta opnar ekki síst ýmsa möguleika fyrir eldri borgara á höfuðborgarsvæðinu, sem geta með Strætó átt skemmtilegan dag á Skaganum eða skroppið þangað í síðdegiskaffi fyrir 90 krónur hvora leið, á afsláttarkjörum Strætó bs. fyrir eldri borgara.  Fleiri hópar, t.d. leikskóla- og grunnskólabörn, auk almennings geta svo að sjálfsögðu  nýtt sér þessa nýju og skemmtilegu viðbót við leiðakerfi Strætó.


 


Með tilkomu Strætó verður mun auðveldara fyrir íbúa nágrannasveitarfélaga t.d. á Kjalarnesi, að nýta sér ýmsa þjónustu á Akranesi, t.d. verslun og aðra þjónustu m.a. Fjölbrautaskólans á Akranesi og Sjúkrahúss Akraness.


 


Almennt fargjald Strætó er 220 krónur en ýmsir afsláttarmöguleikar eru í boði. Hægt er að kynna sér nánar afsláttarkjör og almenn fargjöld Strætó, ásamt leiðakerfi og öðrum gagnlegum upplýsingum á vef Strætó bs., www.straeto.is, en hin nýja leið á Akranes verður sett þar inn og kynnt nánar á næstu dögum.


 


Viðstaddir þennan tímamótaviðburð verða m.a. fulltrúar Vegagerðarinnar, Strætó bs., Sturla Böðvarsson, samgönguráðherra og bæjarfulltrúar á Akranesi.


   
Fara efst
á síðu
  • AkraneskaupstaðurStillholti 16-18, 300 Akranes
    Kt: 410169-4449
  • 433 1000
    Skrifstofan er opin sem hér segir:
    Mánu- fimmtudaga kl. 09:00-15:00
    Föstudaga kl. 09:00-14:00