Á 3000. fundi bæjarráðs Akraness sem haldinn var síðdegis í gær var samþykkt einróma tillaga sem stuðla á að heilsueflingu starfsmanna Akraneskaupstaðar. Tillagan er svohljóðandi:
“Bæjarráð Akraness samþykkir að stuðla að heilsueflingu starfsmanna Akraneskaupstaðar með því að styrkja starfsmenn kaupstaðarins sem vilja stunda reglubundna líkamsrækt í íþróttamannvirkjum Akraneskaupstaðar með árlegu fjárframlagi sem nemur sömu upphæð og árskort í sund kostar á hverjum tíma ( í dag kr. 17.330.-).
Greiðslan er miðuð við fullt starf og hlutfallslega miðuð við starfshlutfall, þó þannig að einungis fastráðnir starfsmenn Akraneskaupstaðar í 33% starfshlutfalli og hærra njóta þessarar endurgreiðslu.
Greiðsla styrkja fer fram hjá skrifstofu Akraneskaupstaðar gegn framvísun kvittunar á greiðslu árskorts.”
Bæjarráð samþykkir tillöguna. Fram kom á fundinum að tillagan nýtur stuðnings þeirra bæjarfulltrúa sem sátu fundinn og eiga ekki sæti í bæjarráði.