Fyrr í þessari viku komu fulltrúar Háskólans í Reykjavík þau Jens Arnljótsson, verkefnisstjóri iðnfræðináms og Málfríður Þórarinsdóttir, sviðsstjóri frumgreinasviðs Háskólans í Reykjavík, í heimsókn í Fjölbrautaskóla Vesturlands og áttu þau fund með Herði Helgasyni skólameistara, Atla Harðarsyni aðstoðarskólameistara og Gísla S. Einarssyni bæjarstjóra.
Til umræðu var mögulegt samstarf Háskólans við Fjölbrautaskólann og við fyrirtæki á Akranesi og í nágrenni.
Á fundinum var ákveðið að hefja vinnu næsta haust við að skilgreina leiðir til að klára stúdentspróf eftir verknám við FVA þannig að nemendur geti farið beint úr Fjölbrautaskólanum í iðnfræði eða verkfræði án þess að byrja á undirbúningsnámi á frumgreinasviði HR.
Einnig var rætt um kynningu á tækninámi fyrir unglinga á Akranesi og mögulega aðkomu HR að henni og kosti þess að nemendur í tæknigreinum við HR vinni verkefni í samvinnu við fyrirtæki á Akranesi.