Bæjarráð Akraness lýsir yfir ánægju með ákvörðun Spalar ehf. um lækkun veggjalda þeirra sem mest nota Hvalfjarðargöng í kjölfar endurfjármögnunar fyrirtækisins á skuldum annars vegar við John Hancock og hins vegar ríkissjóð. Þetta kom fram á fundi bæjarráðs sl. fimmtudag. Bæjarráð telur þó í ljósi ákvarðana ríkisins um ýmsar framkvæmdir í vegamálum nauðsynlegt að ríkissjóður hefði komið að málum t.d. með lækkun á lánum til fyrirtækisins eða afnámi virðisaukaskatts þannig að enn frekari árangur hefði náðst. Beinir bæjarráð því þeirri áskorun til þingmanna Norðvesturkjördæmis að taka málið á þeim grundvelli upp á vettvangi Alþingis.