Að undanförnu hafa sviðsstjórar fjölskyldusviðs, menningar- og fræðslusviðs og tómstunda- og forvarnarsviðs ásamt starfsmönnum ráðgjafa- og sérfræðiþjónustu Akraneskaupstaðar komið saman einu sinni í mánuði og borið saman bækur sínar um málefni barna og unglinga á Akranesi. Talsvert brotfall er í þátttöku barna og unglinga í íþrótta- og æskulýðsstarfi og leiða má af því líkur að sú mikla krafa um keppni, æfingar og frammistöðu hafi þar einhver áhrif.
Hugmyndin með viðurkenningu til einhvers af hinum mörgu íþrótta- og æskulýðsfélögum sem starfa á Akranesi er að hvetja til þess að hægt sé að sameina það markmið "að vera með og þátttakandi" og hlúa að okkar stóra hópi afreksfólki.
Leitað var til formanns stjórnar og hafnarstjóra Faxaflóahafna sf. og ákvað hið nýja hafnasamlag að bjóða okkur Skagamenn velkomna til samstarfs með því að veita 100 þús.kr. styrk og gera þar með viðurkenningu til félags ársins að veruleika.