Fimmtudaginn 14. febrúar s.l. hélt stjórn Hitaveitu Akraness og Borgarfjarðar síðasta fund stjórnarinnar áður en Orkuveita Reykjavíkur tók reksturinn yfir. Á fundinum voru ársreikningar fyrir árið 2001 samþykktir, drögum að breyttum samþykktum vísað til eigendafundar og samþykkt að beina því til næstu stjórnar að láta taka saman sögu HAB. Að stjórnarfundinum loknum var haldinn eigendafundur HAB þar sem samþykktunum var breytt og kosin ný stjórn. Stjórnarmenn verða nú aðeins þrír í stað fimm áður og skipa Ásgeir Margeirsson og Eysteinn Hauksson frá Orkuveitu Reykjavíkur og Helgi Bjarnason frá iðnaðarráðuneytinu nýja stjórn. Endurskoðun verður áfram hjá Endurskoðunarskrifstofu Jóns Þórs Hallssonar. Með þessum breytingum var síðasta skrefið stigið í sameiningarferli orkuveitna á Akranesi og í Borgarfirði við Orkuveitu Reykjavíkur. Orkuveitan fer nú með eignarhlut sveitarfélaganna í HAB og nemur hann 79,3% en ríkissjóður á 20,7%. Gísli Gíslason, sem verið hefur framkvæmdastjóri veitunnar lætur af þeirri stöðu, en Hannes Fr. Sigurðsson verður framkvæmdastjóri veitunnar.
Á myndinni eru Gunnar Sigurðsson, Gísli Gíslason, Ríkharð Brynjólfsson, Kristmar Ólafsson, Sveinn Kristinsson og Kjartan Kjartansson. Á myndina vantar Helga Bjarnason.
Helstu niðurstöður úr ársreikningi HAB eru þessar: