Segja má að stóri vitinn á Breiðinni á Akranesi, sem tekinn var í notkun árið 1946, hafi fengið nýtt hlutverk sl. laugardag þegar gestum og gangandi bauðst að fara upp í vitann og njóta hins einstaka útsýnis þaðan úr yfir Faxaflóann og raunar til allra átta. Það voru félagar úr „Vitanum“, félagi áhugaljósmyndara á Akranesi sem stóðu fyrir þessum skemmtilega viðburði en alls komu tæplega 200 gestir í vitann á laugardaginn. Mikil ánægja var með framtakið og að sögn aðstandenda voru nokkrir sem brustu í söng og hljóðfæraleik inni í vitanum, en í daglegu tali er raunar oftast talað um hann sem „nýja vitann“ til aðgreiningar frá þeim eldri, sem er frá árinu 1918 og stendur utar á sk. Suðurflös út frá Breiðinni.
Nýlega voru þau Rut Berg og Lárus Sighvatsson, skólastjóri Tónlistarskólans á Akranesi í vitanum til að kanna hljómburðinn þar og má með sanni segja að vitinn hafi komið þeim á óvart sem tónleikahús því hljómburður í vitanum ku vera einstakur. Má segja að með þessu bætist við enn eitt aðdráttaraflið á þessum einstaka stað sem Breiðin er. Fjallað var um vitann og tónlistarflutning þeirra í fréttum Ríkisútvarpsins um helgina. Smellið hér til að hlusta á fréttina og þverflautuleik Rutar Berg í stóra vitanum á Breiðinni. Það var Friðþjófur Helgason sem gerði myndbandið.