Í gær, sunnudaginn 13. janúar, var undirritaður samningur milli Akraneskaupstaðar og Verkalýðsfélags Akraness um að Akraneskaupstaður leigi til 15 ára 3. hæðina að Kirkjubraut 40. Um er að ræða 451 fermetra húsnæði. Tilgangurinn er að starfrækja félagsstarf aldraðra í húsnæðinu og starfsemi á vegum Félags eldri borgara á Akranesi og í nágrenni (FEBAN). Hluti húsnæðisins er afhentur nú, en seinni hlutinn verður afhentur á komandi sumri. Gert er ráð fyrir því að í september verði starfsemin þar komin að fullu í gang. Um leið og leigusamningurinn var undirritaður var samhliða gengið frá samkomulagi milli Akraneskaupstaðar og FEBAN um að FEBAN hafi umsjón með hinu leigða húsnæði og annist útleigu þess. Með þessum samningum er ákveðið að félagsstarf eldri borgara og FEBAN verði að Kirkjubraut 40 á komandi árum. Við undirskriftina tóku m.a. til máls Gísli Gíslason bæjarstjóri, Sveinn Kristinsson, forseti bæjarstjórnar, Bjarnfríður Leósdóttir formaður FEBAN, Hervar Gunnarsson, formaður VLFA, Skúli Þórðarson og séra Björn Jónsson og lýstu allir yfir ánægju sinni með að þetta skref hafi verið stigið.