Hin árlega „Hátíð hafsins“ verður haldin á Akranesi laugardaginn 4. júní n.k. og er dagskráin afar viðburðarík - þarna ættu því allir að geta fundið eitthvað skemmtilegt við sitt hæfi. Undirbúningur og framkvæmd hátíðarinnar er að mestu í höndum Björgunarfélags Akraness í samstarfi við Akranesstofu. Hátíðin fer að venju fram við Akraneshöfn og er dagskráin sem hér segir:
11:00 Smábátasjómenn bjóða gestum í siglingu á meðan skipsrúm leyfir.
12:00 Grillaðar pylsur við höfnina.
13:00 Fjölbreytt skemmtidagskrá við höfnina. Ýmsir viðburðir á hafnarsvæðinu. Upplagt að rölta um og skoða lífið við höfnina.
13:00 Markaður með útivistarbúnað við höfnina. Hægt verður að leigja borð og selja notaðan viðlegubúnað.
13:30 Kaffisala slysavarnakvenna. Slysavarnadeildin Líf selur sjómannadagskaffi í húsnæði sínu, Jónsbúð.
14:30 Tónberg - Samkór Reykjavíkur heldur tónleika. Stjórnandi: John Gear. Gestakór: Kvennakórinn Ymur. Stjórnandi: Sigríður Elliðadóttir. Miðaverð kr.1000 (frítt fyrir 16 ára og yngri).
13:00 - 16:00 laugardagur og sunnudagur - Fróðá á Safnasvæðinu - Listasmiðja fyrir börn!
Aðgangur ókeypis! Málið á tréfiska og sendið sjómönnum skilaboð. Óskið sjómönnum góðs gengis með veiðina og skrifið vonir ykkar og óskir um framtíðina á fiskana. Fiskurinn fer svo í veiðinetið og sameinast þar vonum og óskum annarra barna. Föndrum saman og búum til fiska á Hátíð hafsins og sjómannadaginn. Umsjón: hugMYND myndlistarmiðstöð.
Laugardagur og sunnudagur kl. 14:00 til 18:00 Listasetrið Kirkjuhvoll
Ljósmyndasýning - Sjómennska , veiðar og vinnsla á síðustu öld. Á sýningunni eru ljósmyndir með greinagóðum texta sem gefur okkur frekari skilning á hvernig sjómennskan, veiðar og vinnsla var á síðustu öld. Meðal annars eru myndir af skipum, bátum, áhöfnum, vinnslu í landi og fleiru tengt sjómennsku á Akranesi á síðustu öld. Einnig eru ýmsir munir þessu tengdir á sýningunni. Sýningin er samstarfsverkefni Ljósmyndasafns Akraness, Kirkjuhvols og Haraldarhúss og er styrkt af Menningarráði Vesturlands. Sýningin stendur til 12. júní og er opið alla daga nema mánudaga frá kl 14:00 – 17:00. Athugið breyttan opnunartíma.
20:00 Tónberg - Karl Hallgrímssonflytur lög af nýútkomnum geisladiski í bland við eldri lög. Með Karli er landslið hljóðfæraleikara sem eru: Birgir Baldursson á slagverk, Eðvarð Rúnar Lárusson ( Eddi Lár ) á gítar, Kjartan Valdimarsson á píanó og Pálmi Gunnarssonhinn eini og sanni á kontrabassa.
Þetta er eitthvað sem enginn má missa af. Miðaverð kr. 2000. Ekki tekið við greiðslukortum.
Safnasvæðið alla helgina!
Eldsmiðir á Safnasvæðinu! Fjöldi innlendra og erlendra eldsmiða mæta á svæðið.
Sjómannadagur 5. júní
Dagskrá Sjómannadagsins verður með hefðbundnu sniði og hefst í kirkjugarði Akraness kl. 10:00 þar sem minnst verður drukknaðra sjómanna sem aldrei hafa fundist.
Kl. 11:00 verður hátíðarguðsþjónusta í Akraneskirkju þar sem sjómenn verða heiðraðir. Prestur er Sr. Irma Sjöfn Óskarsdóttir. Að messu lokinni verður gengið að "Sjómanninum", minnismerki sjómanna á Akratorgi og lagður að því blómsveigur. Merki sjómannadagsins verður til sölu á Akranesi alla helgina.
16:00 Tónberg - Smári Vífilsson flytur íslensk og ítölsk einsöngslög. Við píanóið er Bjarni Þ. Jónatansson. Miðaverð kr. 1500. Ekki tekið við greiðslukortum.
Skagamenn eru hvattir til að taka virkan þátt í þessari skemmtilegu hátíð!
|