Laugardaginn 28. maí verður efnt til umhverfishátíðar á Akranesi en þennan dag koma bæjarbúar saman, tína rusl og fegra opin svæði í bænum. Hátíðin hefst við Íþróttamiðstöðina að Jaðarsbökkum kl. 10:00 stundvíslega en þá verður skipað í hópa sem síðan halda af stað til hreinsunar víða um bæinn. Gert er ráð fyrir að hreinsunarherferðinni ljúki um kl. 12:00 en þá munu allir koma saman Breiðinni þar sem boðið verður upp á hressingu, grillaðar pylsur og gos. Athugið þá breytingu sem orðið hefur að átakinu lýkur á Breiðinni um hádegisbil.
Bæjarbúar, ungir sem gamlir eru hvattir til að taka virkan þátt í hátíðinni því mikið er í húfi. Gaman væri að sjá heilu fjölskyldurnar sameinast til verka úti um allan bæ! Framundan er viðburðaríkt sumar þar sem vænta má fjölda gesta og ferðafólks í bæinn, m.a. á Norðurálsmót og Írska daga. Öll viljum við að bærinn skarti sínu fegursta í sumar – er það ekki?
Allar nánari upplýsingar um umhverfisdaga á Akranesi veitir Íris Reynisdóttir, garðyrkjustjóri, iris.reynisdottir@akranes.is eða í síma 433 1000.