Gengið hefur verið frá ráðningu Helgu Rúnar Guðmundsdóttur í starf við Upplýsingamiðstöð fyrir ferðafólk og verkefni er tengjast ferðaþjónustu á Akranesi og var hún valin úr hópi 10 umsækjenda um starfið.
Starfshópur um ferðaþjónustu á Akranesi, sem skipaður var sl. vetur, lagði á það áherslu að starfsemi upplýsingamiðstöðvar og upplýsingagjöf fyrir gesti og ferðafólk yrði efld og að ráðin yrði sérstakur starfsmaður til að sinna þessum verkefnum, en ráðið er í starfið til 6 mánaða. Að þeim tíma loknum verður reynslan af verkefninu metin og ákvörðun tekin um framhaldið. Helga Rún mun einnig koma að ýmis konar verkefnum er tengjast uppbyggingu ferðaþjónustu á Akranesi og taka þátt í skipulagningu og undirbúningi viðburða, m.a. í samstarfi við fyrirtæki og hagsmunaaðila í bænum.
Áætlað er að Helga Rún komi til starfa um miðjan maímánuð en upplýsingamiðstöðin verður staðsett í „Skagamollinu“ við Kirkjubraut.
Akraneskaupstaður býður Helgu Rún velkomna til starfa og þakkar jafnframt öðrum umsækjendum fyrir þann áhuga sem þeir sýndu með umsóknum sínum.