15. ágúst 2003 11:58

Yfir til þín 6. september

Á íbúaþingum er unnið með gula miða og þurfa þátttakendur því ekki að koma í ræðustól til að tjá skoðanir sínar.

Þessar vikurnar stendur yfir undirbúningur að íbúaþingi sem haldið verður á Akranesi laugardaginn 6. september n.k. Yfirskrift þingsins verður "Yfir til þín", þar sem skírskotað er til þess að á þinginu gefst íbúum tækifæri til að taka virkan þátt í mótun framtíðarstefnu fyrir sveitarfélagið.  Hvernig vilja Skagamenn sjá bæinn sinn þróast?  Hvað mun einkenna Akranes árið 2016? Niðurstöður og hugmyndir íbúanna verða nýttar við endurskoðun aðalskipulags, sem nú stendur yfir. 

Umsjón með verkefninu er í höndum ráðgjafarfyrirtækisins Alta og skipulagsfulltrúa Akraneskaupstaðar.  Á meðfylgjandi mynd eru börn úr Mýrdalshreppi sem þátt tóku í sambærilegu þingi fyrir nokkru. Hér á Akranesi verður þáttur barna og unglinga einnig stór hluti af starfinu því sjónarmið þeirra er að sjálfsögðu nauðsynlegt að fá  með í umræðu um framtíðarskipulag sveitarfélagsins.