Hátíðarhöld í tilefni af 17. júni verða fjölbreytt og glæsileg á Akranesi í ár í tilefni af því að 70 ár eru liðin frá því að Akranes hlaut kaupstaðaréttindi. Dagskráin hefst á Safnasvæðinu að morgni þjóðhátíðardagsins en aðalhátíðarhöldin verða í Garðalundi. Þangað verður gengið í skrúðgöngu sem leggur af stað frá Íþróttamiðstöðinni á Jaðarsbökkum kl. 13:30. Meðal dagskrárliða í Garðalundi má nefna að hin ástsæla hljómsveit Skagamanna, Dúmbó og Steini kemur saman í tilefni af afmælinu og flytur nokkur lög á hátíðardagskrá sem fram fer í Garðalundi á milli kl. 14:00 og 16:00. Gera má ráð fyrir að hið fræga 17. júní lag hljómsveitarinnar “Hæ, hó, jibbí jei...” verði sungið þar fullum hálsi auk annarra smella þessarar frægustu hljómsveitar Skagamanna. Í Garðalundi verður fjölbreytt dagskrá í boði, leikir og margt fleira. Auk þess býður Akraneskaupstaður gestum og gangandi upp á pylsugrillveislu – á meðan birgðir endast!Um kvöldið verða útitónleikar í Garðalundi þar sem Queen dagskráin með Matta Matt og Magna er meðal dagskrárliða en þar verða einnig My Sweet Baklava, Klint og Jimmy Hendrix Show. Tónleikarnir hefjast kl. 20:00.Dagskrá 17. júní á Akranesi má skoða hér á vef Akraneskaupstaðar.